Ms BIU Santé n^o 2007, f^o 178 v^o.

Clariss. viro D. Io. G. Volcamero, Collegij Medici Decano, et
Visitatori Officinarum Seniori, Noribergam.

Postremæ tuæ 16. Sept. sic paucis respondeo. Fasciculum tuum
accepi, Vir Cl. 6. v. Nov. in quo deprehendi plurima Ecc. Leichneri, et
D. Felwingeri : imprimis v. librum quem Nomini meo inscriptum voluit Vir
optimus. Pro impensis antehac à Te meo rogatu factis, mitte quæso
Indiculum, quem persolvam D. Picques. Eccardus Leichnerus vivitne
Erfurti ? estne senex ? Deus illi benefaciat, servétque Urbem, tanti
Viri habitaculum, ab insidijs inimicorum : imò malè perdat novum
illum Germaniæ vestræ Tyrannum, Elect. Moguntium. Indica mihi
quæso, quid putes mihi agendum cum D. Felwingero, et quando : nullam
accepi ab eo Epistolam : quid putas à me illi esse mittendum pro αντιδωρω ?
Cl. viro D. Richtero salutem plurimam offero, ad quem mittendos hîc habeo libros
quosdam, quos ipse à me petijt, præsertim v. les Memoires de M. de
Sulli, etc. et aliquos Caroli mei : sed per quam viam sint ad vos perventuri,
nondum scio : de eo agam cum D. Picques : quod si aliter non possim, mittam
Lugdunum ad Sponium nostrum, cujus ope jam ad Te pervenisse puto quæ
antehac à me petijsti, Opera omnia nostri Ballonij. Nihil mihi superest
effatu dignum quod ad Te scribam : ideo vale, et me ama, Vir Cl. Parisijs,
die Ven. 7. Nov. 1664.

Tuus ex animo, Guido Patin.

Memento quæso mihi emendorum quæ sequuntur. Io Theod. Schenckij
Historia plantarum generalis. 4. Ienæ, 1656. Phil. Caroli in Bibliotheca
Romana. | Dan. Vechner Hellenopol. | Exercit. Velschij in rat. lethal.
vuln. judic. | Nic. Honnigeri Speculum Rom. Pontif. | Selneceri Orationes.
Io. Musæi Disput. de Rep. | Mich. Havemanni Gamologia, de Iure con-
nubiorum. | Orationes Franzij. | Io. Fabricius de Simia Dei, nempe
Diabolo. | Richterus de literatorum jure et privilegijs. 4.