Commentaires de la Faculté de médecine de Paris
BIU Santé, tome xiii, fo 493 ro.
In nomine sacrosanctæ et individuæ Trinitatis,
cui laus, honor et gloria in æternum maneat :
Quod felix, faustum, fortunatúmque sit : incipit
Commentarius secundi Decanatus Magistri
Guidonis Patin, Bellovaci, Doctoris Medici Paris.
à die Sabbathi 4. Novembris, anni 1651. ad diem
Sabbathi, 2. Novembris anni 1652.
Acta, Comitia, Decreta Facultatis Medicinæ Paris.
Die Sabbathi, 4. Novembris, 1651. in comitijs post
sacrum habitis, pro more, convocata Facultas, audita
gratiarum actione, et postulatione Decani, prorogavit
decanatum Magistro Guidoni Patin, Bellocavo, in
annum proximum. Postea, gratijs Facultati habitis
à tribus Professoribus, munere suo defunctis, nempe Magg.
Io de Bourges, Francisco Blondel, et Germano
Preaux : Decanus obtulit Facultati supplicem libellum
Medicorum Trecensium, in Senatu Parisiensi litigantium
adversus quendam suæ dictæ Urbis tonsorem Chirurgicum,
dictum Nicolaum Bailli, qui Medicæ artis operibus sese
immiscebat, et remedia quædam exhibebat tum pur-
gantia, tum marcotica; à quibus pessimè habuerant
ægri quibus ab eo administrata fuerant. Hoc autem
supplice libello postulabant illi à nobis, ut gratiosè et
favorabiliter in eam litem cum ijs defenderemus adversus
illum tonsorem, in Senatu Parisiensi. Eorum petitioni
annuit Facultas, ea lege ut fiat eorum sumptibus.
