Ms BIU Santé no 2007, fo 36 ro.
Clarissimo viro D. Christiano
Buncken, Doct. Medico
Hamburgensi.
Ante mensem ad Te scripsi, vir clarissime, ecce iterum scribo ut Te moneam,
me Domino Pensorn, Legato vestro commisisse duos fasciculos librorum, in
quorum uno habetur liber Orthodoxus Mag. Claudij Germain, Collegæ nostri,
adversus Antimonium : in altero liber novus D. Riolani adversus Pecquetum
et Pecquetianos Doctores duos è nostris : cum alio libello super eadem quæstione,
qui bilem commovit Pecqueto ; et cujus verum authorem facit Mentellum : idem quoq.
cum Pecqueto quamvis adversario sentit Riolanus. Alij fortè succederent
libelli de intricatissima quæstione. Viderint ipsi. Tu interea vale, et me ama.
An vivat et valeat, et quid moliatur Bartholinus noster scribe quæso :
imò et Tu, quî valeas, an uxorem duxeris : de Te tandem scribe, et reputa nil.
Tuum ex animo Guidonem Patinum, Doct. Med. Paris.
