Ms BIU Santé no 2007, fo 56 vo.
Clarissimo viro D.D. Volcamero, Doct. Med. Norimbergam.
De tribus Te monitum velim præsentibus literis, Vir Cl. quamvis 1. Certum facies D. Guernero
brevibus ac paucorum verborum :
Rolfinkio, quem ex animo saluto me Lugdunum misisse ad amicum
nostrum D. Car. Sponium, libellos illos duos antehac expetitos,
nempe Theophilium, de fabrica humani corporis, etc. cum Eroticis
Aristæneti Epistolis, 3. editionis : spero D. Sponium brevi utrumque
ad Te transmissurum : Te v. postquam acceperis, ad D. Rolfinkium,
quem officiosissimè si placet, nomine meo salutabis.
2. Clarissimus Senior noster D. Riolanus hîc vitam cum
morte commutavit, dìe Lunæ, 19. Febr. hora septima vespertina,
anno æt. 77. si quinque horas superaddideris : triduo tamen laboravit,
maligna febre extinctus, cum urinæ suppressione, etc. Quid in
posterum typis mandandum reliquerit, adhuc incertum est, propter
lites inter ejus liberos subortas in adeunda hereditate, necdum
compositas : ejus discordiæ causa est filius junior, post diuturnam cum
Patre litem, et clandestinas nuptias Senatuconsulto à Patre
impetrato prohibitas, sapientissimorum Patronorum consilio, et
horum o<mn>es cautelas atque regulas Iuris, ab utroque Parente,
adhuc enim est in vivis ipsa Mater, exheredatus. Ille, dum viveret,
sæpe cogitabat de nova Editione sui Enchiridij Anat. et Pathol.
quod ut spero, primum prælo subijciretur, non pænitendis accessionibus
locupletatum. De cæteris sileo.
3. Literas tuas nobili Dano traditas, in quibus habetur syllabus
librorum à Te mihi redemptorum, non dum accepi. Libros quoque D.
Pomero à Te mihi transmittendos in dies expectamus : necdum eos
accepit D. Lud. de Bellavoine, de quibus eum sæpe adij. Pro libro
D. Rolfinckij, quo me donatum voluisti, gratias ago immensas, post-
hac pro virili retaliaturus. Filij mei ambo Doctores Medici Te
salutant. De pretio librorum transmissorum agam Tibi reddendo agam
cum D. Picques. Secundam Operis sui Anatomici partem subjecitur
prælo D. Rolfinkius ? quid de ea mihi sperandum censes, scribe
quæso. Viros eruditissimos Collegas tuos omnes, imprimis v. D.D.
Nicolaum, Hofmannum, Felwingerum, Te v. imprimis saluto,
vir sapientissime, Tibique pro tantis laboribus et amore
in me tuo singulari, ac benevolentia non vulgari, omne officiorum
genus polliceor ac offero. Vale igitur, et me ama. Scriptum
Parisijs, die Veneris, 6. Maij, Aprilis, 1657.
Tuus æternum futurus Guido Patin.
