Ms BIU Santé no 2007, fo 58 ro.
Clariss. viro D. Io. Georgio Volcamero, Doct. Med. Noribergam.
Tuas accepi, vir præstantissime, datas 11. Maij, pro quib. ingentes habeo gratias.
Libros antehac à me transmissos pro D. Rolfinckio utinam accepis, quem saluto ex animo,
ut et Clariss. viros D.D. Conringium, Nicolaum, Felwingerum et alios amicos rebus
nostris faventes. De Riolano nihil habeo novi : agitari dumtaxat audio negotium
sive consilium de promovenda in folio editione nova omnium Operum Riolani Patris, cum varijs
Tractatibus novis numquam antehac editis, de venæ sectione, de purgatione, de variolis et
morbillis, de lue venerea, de morbis puerorum et mulierum, etc. Libros per vestrum D.
Pomerum transmissos accepi quidem sed nondum literas tuas nobili Dano D. Wipæo tradi-
tas, in quib. eorum pretium continetur : alterum fasciculum per D. Picques mihi
reddendum in dies expecto, ut utrique satisfaciam. Unicus mihi superest quærendus
liber è vestra Germania, pro quo obtinendo opem tuam imploro : ille est Lucas
Stenglius de Stibio, in 4. Libellus est continens Tractatum quendam, et aliquot
positiones contra Antimonium. Libelli titulus est Apologia adversus Stibij Spongiam, etc.
Cui insuper adjuncta est quæstio, Num idipsum ab ægris citra ullum incommodum per
os assumi possit. Angustæ, 1565. in 4. aut 1569. in 4. Hîc habebam ex dono Riolani,
qui sed perijt cum Collega quodam meo, cui mutuò dederam. Si ad me redijsset tale
Exemplar, jamdudum illud novis typis mandari curassem : cujus recuperandi quoniam
spes omnis mihi decollavit, ad Te confugio, ut tandem obtineam. Brunonem Seide-
lium tandem nactus sum, nec est quod amplius angaris de eo reperiendo : enitar pro virili,
ut hîc denuo typis mandetur libellus optimus ac utilissimus, ad retundendam
Empiricorum et Chymistorum impudentiam, dum de morborum planè incurabi-
lium curatione mirabili pollicentur. Quod spectat ad Opus Geographicum P.
Philippi Briet, Iesuitæ mihi noti, et si fibulam illam nigrámq. vestem ex-
cipias, viri boni, habeo de illo Opere quod Tibi referam, Téq. moneam. Ut
Tibi super ea facerem satis, ipsum Bibliopolam D. Seb. Cramoisi adij, ut et ipsum
Authorem, qui nunc in Urbe moratur. Scias itaque velim illius Operis Geogra-
phici tres exstare tomos, in 4. cum 2 aliquot 1 figuris æneis : primus continet
Institutiones Geographicas priore sui parte : posteriore verò de Europa agit in generale,
de Insulis Britannicis, de Hispania, Gallia et Belgio. Secundus tomus continet
Germaniam antiquam et novam, et regna Arctoa, nempe Sueciam, Daniam
et Norvegiam : Sarmatiam et Poloniam : Illyricum, Græciam antiquam et novam :
cum Turco-Græcia et Veneta dicione. Tertius tomus, qui dumtaxat vocatur
Appendix ad Tomum 2. describit Italiam antiquam et novam, Siciliam, Sardi-
niam et Corsicam : tres verò illæ partes hîc vænundantur 25. libellas Turo-
nenses : quæ superant octo Thaleros vestræ monetæ. Summo studio commen-
datur Opus istud Geographicum à Patribus Societatis, singulis omnium classium
Auditoribus, ut citò distrahantur exemplaria, et nova promoveatur
editio, duplo major et amplior futura : quam Author ipse inchoatum
iri sperat, intra annum unum, et ex trib. illis partibus quæ Europam com-
pletuntur, grandiorem tomum componet in folio : quod ubi præstiterit, Asiam
subjunget amplissimæ descriptionis, pro 2. tomo in folio : postea tandem dabit
Africam et Americam : quas habet singulas penes se profectas, ut solius
Typographi commoda præstolatur. Ecce nunc habes rem ipsam super ea vide et
decerne : an
