Ms BIU Santé no 2007, fo 62 ro.
Eidem Io. Dan. Horstio, etc.
Heri ad Te scripsi, Vir Cl. etiam adhuc hodie scribo, ut scias me perlustratis
singulis Operibus Horstianis, invenisse librum Iac. Horstij, de vite vinifera :
de quo itaque recuperando nihil laborabis. Scribe quæso quo anno obierint
præstantissimi illi Scriptores Iac. et Greg. Horstius. Ecce mihi nuntiatur
ex Anglia, vitam cum morte commutavitasse virum eximium Dominum Gul.
Harvæum, Circulationis sanguinis inter Recentiores primum inventorem.
Coætaneus erat et amicus nostri D. Riolani, et eodem anno ad plures
ambo penetrârunt. Venio ad tuam Manuductionem postremæ editionis.
De sphalmatum typographicorum numero propter Te seriò doleo, præ-
sertim in Græcis : qua de curanda puto Tibi incumbendum esse in novam ejus
impressionem, quæ sit castigatissima : quam utinam hîc possem promovere,
sed abhorrent omnes nostri typographi, propter operarum penuriam, impressoriæ
chartæ adauctum pretium, et impeditum per Bellonæ furores commercium,
cum exteris. Pag. 8 quis ille est author Ioach. Illyes, pag. 13 de nat.
Medic. Pag. 11. quis alter ille Hyacinthus Iordanus, theor. Med. D.
Thom. pag. 528. Pag. 12. extremo versu, quis ille Io. 21. Papa Rom. pag.
139. Pag. 27. hîc olim Germanum quendam dictum Conerdingium, novi
et amavi, cujus theses numquam accepi, quas se missurum promiserat :
auditor fuerat 2 D. Conringij, 1 viri doctissimi : hîc vivebat circa annum Ch.
1648. si noveris illum saluta quæso meo nomine. Pag. 39. Puris à pulmone
per urinas excretionem ter memini me vidisse ab annis 33. quam per
arterias fieri autumabat vir sapientissimus et Medicæ artis scientissimus
Mag. Nicolaus Pietreus, Medicus Paris. qui hîc obijt Antiquior Scholæ
Magister anno 1649. Pag. 42. De Gassendo dicam paucis. Fuit
ille mihi amicissimus : sed tanta hæmatophobia laborabat, ut ex pul-
monis corruptela obierit hic anno 1655. æt. 64. quem morbum facilè
declinasset, aut saltem ab eo liberatus fuisset, si venæ sectionem initio
morbi admisisset : ejus Opera omnia simul collecta eduntur Lugduni nostræ,
in sex tomis in folio. Pag. 67. Vidi in muliere pene octogenaria, quæ ex
longo mærore contabuerat, cum scirrho hepatis, calculos 75. in vesicula
fellea, quadrata figura, tesseris aleatorijs simillimos, in hac urbe Parisiensi.
