Ms BIU Santé no 2007, fo 85 ro.
Clariss. viro D. Io. Ant. Vander Linden, eximio Medicinæ Professori, Leidam.
Breve tuum Epistolium accepi, pro quo gratias ago. Gaudeo quod acceperis fasci-
culum meum : de folio Gassendi ne angaris quæso : haud dubiè habebis, illud
namque tradidi D. Angot, qui mihi tunc pollicitus est se inclusurum in alio fasci-
culo librorum, ad D. Elzevirium mittendorum : quod præstitit : et forsan illud
habes dum hæc scribo. In tuo libro de Scriptis Medicis qui currit sub prælo, ne
omittas hunc titulum ; Claudij Galeni Chronologicum Elogium, R.P. Philippo
Labbeo Scriptore : cum Iacobi Mentelij V.C. ad eumdem Epistola. Parisijs,
e Typographia Claudij Cramoisi, viâ Carmelitarum, sub Sacrificio Abelis 1660.
Lugduni ad Ararim sub prælo sudat Cardanus totus, cujus erunt decem grandes
tomi, in folio : finem suum obtinebit istæc editio intra 16. menses. Ibidem
excuditur Paulus Zacchias in fol. duobus tomis grandioribus, ex quib. alter
auctior, alter planè novus futurus est. Salutem Tibi reddunt ambo Filij mei : et ego pro
constanti illo et sincero amore in me tuo, gratias ago amplissimas. Elogium Galeni
et alia quædam pro Te hîc habeo : plura illis subjuncturus si occurrant. Doleo
Ægrè fero serióq. doleo, quod vir optimus et amicus noster eximius D. Romphius
brevi sit abiturus in Germaniam : Argentinam se dicit iturum : per eum scribam
ad D. Melch. Sebizium, de cujus Speculo Medico-practico nihil video nec audio,
sed in dies aliquid expecto. Vive vale, et me ama : qui sum Tuus ex animo Guido P.
Scribebam Parisijs, die Iovis, xv. Aprilis, 1660.
