Ms BIU Santé no 2007, fo 87 vo.
Clar. viro D. Thomæ Bartholino. Hafniam.
Tuam accepi, Vir Cl. 20. Iunij datam, cum mensura vinculi
quod requiris pro hernioso. Ego simili utor vinculo propter idem
impedimentum, ne dicam affectum, quo laboro ab annis quindecim :
Ad hoc habeo mihi certum et fidum artificem, cujus opera utor sæpius
pro varijs ægris eodem morbo implicitis : Illum conveni, rogaviq. ut epistola
tua audita, et transmissæ mensuræ habita ratione, vinculum idoneum nobis
conficeret ad votum tuum, mercatori nostro tradendum ut ad vos
transmitteret. Qua re perpensa et maturè discussa, negavit istud
fieri posse : dixitq. se non missurum ne oleum et operam perdamus, quoniam
vinculum mensura transmissa non sufficit ad idoneitatem vinculi conficiendam, utpote quæ
longitudinem dumtaxat nobis indicet, non v. crassitiem aut tenuitatem
lumborum et ilium : difficultatem etiam adauget ipsius vestratis
herniæ duplicitas. Pecuniam obtuli quantam vellet, modò fuerit
optimum ac idoneum vinculum : nullum se negavit acepturum :
nec vinculum à quoquam tradi posse. ^ Vide super ea re quid velis fieri. Si quis vestrum huc appetat,
et ad me veniat, habeo quædam Tibi mittenda, præsertim verò
vitam Galeni ex ejus operib. excerptam à quodam Iesuita, mihiq.
dicatam, ut et Senatuconsultum quoddam adv. Chirurgicos
nimis superbientes, etc. Cariss. fratres et alios amicos saluto. Vale.
Datum Parisijs, 30. Iulij, 1660.
Tuus ex animo Guido Patin.
