Ms BIU Santé no 2007, fo 93 vo.
Cl. viro D. Io. Ant. Vander Linden, Medicinæ Doctori, Leidam.
Vir Cl. In dies expecto fasciculum tuum traditum D. Lotio, qui
dicitur adhuc hærere Rothomagi, nec in hanc Urbem devehi posse
propter adauctum Sequanam ex nimio aquarum proventu.
Reginæ nostræ Medicus Doctor Puelles, nullos libros novit
ex Hispania, et forsan nulli sunt : non est ideo quod subsidij
quidquam ab eo expectes. Exiguum meum fasciculum spero Te
tandem acceptarum. D. Caulier Te salutat. Noster Angot
mihi nuper affirmavit, se ad D. Elsevirium, pro Te misisse
folium Gassendi quod Tibi deest : quod si non acceperis, aliud
mittam per aliam viam. Mensuram tui Galeni tradidi juniori
Charterio :pollicitus est se mihi allaturum tomum 7. et xi.
mense proximo ; nec citiùs fieri potest, propter litem inter
heredes pendentem, i. vidua et liberos primæ uxoris. Paulum
Zacchiam nec tam citò sum habiturus, cujus videlicet Epistola
dedicatoria nondum est Lugdunum transmissa, ab heredibus
Romæ degentibus. De quorum pretio nihil refundes, sed ego
mittam, ut fiam bonum nomen, ac me liberem, si possim.
