Ms BIU Santé no 2007, fo 104 ro.
Clariss. viro D.D. Io. Ant. Vander Linden, Leidam.
Vix habeo quod ad Te scribam, præter ea quæ scripsi 13. Aprilis, cum
ad Te misi Epistolam nostri Petiti : cujus novus liber excuditur de Risu,
ut et alter Divione, Henr. Citadini de secanda vena κατ’ ιξιν. Puto
ac spero utrumque brevi proditurum, quos statim ad Te mittam pro tui
Indicis nova editione. Hîc habeo P. Zacchiæ Quæst. Medicolegales, 2. tomis
edit. Lugd. Tibi mittendas : Galenum v. nondum habeo : licet ista vidua
semper in proximum polliceatur. Hîc vidi M. Sebizij Speculum Medicinæ practicum,
2. tomis in 8. nuper editum. Cl. et amantissimum virum D. Romphium saluto,
et hîc inclusam commendo tradendam D. Stuart. Vidistine ne novam
Pharmacopæam Rostochianam ? et aliquot Opuscula nova Casp. Bartholini,
quæ scripsit ad me proximè missurum. Lugduni Celtarum currit sub prælo,
in 4. novum Opus posthumum Rod. Castrensis, Prof. Pisani, de signis
morborum. Vidistine Campum Elysium Quæst. Medicarum, Bruxellis editum,
authore quodam Medico Hispano. Ante annum prodibit Cardanus totus, x.
tomis in folio. Hîc duos vidi libros Romæ editos, unum in folio, qui est commen-
tarius in Prognosticum Hipp. alterum in 4. de Peste : authore quodam Medico
Gallo, Burdegadelensi, Carolo Valesio du Bourgdieu, qui Romæ Medicinam profitetur.
Vive, et vale, vir præstantissime. Parisijs, 23. Iunij, 1661. Tuus totus G.P.
Quæritur hîc Bibliopola, à D. Lantin, Senatore Divionensi, qui proprijs
sumptibus edat in folio aliquot Opuscula του μακαριτου Cl. Salmasij :
qui sunt de homonymijs plantarum, de speciebus antiquorum, etc. Cl.
Authoris Filius, qui nuper obijt in Burgundia sua tabidus, isthæc edenda
reliquit D. Lantin, viro nobili et literato. Vive, etc.
Clar. viro D.D. Io. G. Volcamero, Medicinæ Doctori, Noribergam.
Dum tuas expecto, etc. scripsi ad illum die 1. Dec. 1661. Per Dominum de Lindenam, sed
nullum retinui exemplar, utpote quæ dumtaxat ραϊομον meam significabat, etc.
