Ms BIU Santé no 2007, fo 161 ro.
Cl. viro D. Iulio Hakeberg, nobili Germano, Helmstadium.
Cum magno gaudio tuas accepi, Vir Cl. 30. Nov. scriptas, quæ mihi per Dominum
Bec redditæ fuerunt 13. Ianu. præsentis anni ; et pro quib. gratias ago Tibi
singulares. Quî se habent D.D. Conringius et Meibomius, Viri Cl. et doctissimi ?
quid ille novi scribit, et in bonum publicum, more suo molitur ? hîc v. quid agit ?
an publicè docet ac publicè profitetur Medicinam in Academia vestra Iulia ? duos illos ves-
trates Doctores ideo commemoro, quia utrumque diligo et magnifacio : ideóq. Te
rogatum velim, ut quum ad me scribes, de tantis viris aliquid mihi significas,
nempe de eorum bona valetudine et Operibus. Et utinam vivant et ac pancra-
ticè valeant, dum de ijs illis per literas tuas istud Evangelium expecto. Pro D.
Conringio metuo propter senium et asperitatem hyemis immodicam : est enim
nimirum frigus extenuatis corporib. inimicissimum : utinam tot molestias
superet, ac perennet. Sed redeo ad Meibomium nostrum, nobilem ac eruditum
adolescentem : quid me jubes de eo sperare ? habet in manibus duplex opus
Viri Cl. sui Parentis ? nempe Tractatum Philologicum de Cervisia ? et
veterum Medicorum historiam : quandonam utrumque lucem videbit ? hoc sciam
per Te si volueris. Quod spectat ad aliud negotium à Te mihi propositum,
et de quo inquiris, scias velim me ejus rei curam habiturum, nec quidquam
laboris omissurum, si qua sese offerat occasio, ut negotium Tibi succedat, et
voto tuo quantum in me situm erit, plenissimè satisfaciam : videbo igitur, et
rem illam curabo, atque ad Te scribam si ubi promovero. Filij mei ambo Te
salutant, et gratias agunt : primogenitus est Robertus : alter est Carolus,
qui scripsit de familijs Romanis : et cujus exemplar accepisti, Principi
vestro offerendum : uterque Doctor est Medicus Paris. ac uterque doctis-
simus : utinam quo cœperunt pede feliciter pergant, in studio utriusque
eruditionis ac probitatis. Principis vestri reponsum Carolus meus nul-
lum accepit. De Thesibus Medicis et alijs libellis, quorum Indiculum Tibi
tradidi, aurem vello, rogóque quam possum fortiter, ut velis meminisse,
et omnia illa mihi emere, mitteréque ad D. Bec, cui statim, præsentibus
nummis, totum pretium à Te indictum, æquo animo refundam : præter ea quæ
habentur in Indiculo, si quæ ejusdem generis alia sese offerunt, vetera vel
nova, superadde quæso eidem Fasciculo : nullam viam tutiorem esse puto
quàm per D. Bec : aliàs enim quærerem mihi aliam, sed frustra agerem. Pro-
ximo vere literas tuas expecto : ut et ipsum Fasciculum Theseωn : tunc enim
spero fore ut per exactam hyemem nullum supersit pestilentiæ vestigium.
