Ms BIU Santé no 2007, fo 169 vo.
Clarissimo viro Io. Georgio Volcamero. Noribergam.
Ad postremam tuam paucis repondebo, Vir Cl. Cras agam cum Bibliopola
nostro, pro Ballonianis omnibus, quæ postehac ad Te mittam, per viam tutam i. Lugdunum
per Sponium nostrum ; vel per D. Picques, si habeat aliquam occasionem : in eodem
fasciculo includam Chiffletium et Aristænetum, si occurrant. Utinam servet Deus
Opt. Max. Cl. virum D. Mich. Dilherum, virum impensè doctum in multos annos :
cui in tale affectu valde profuturum putarem, post generalia remedia, venæ sectionem et purgationem, balneum aut semicupium ex aqua tepente. De Pro ejus convalescentia ex animo
gaudeo : utinam perennet in multos annos vir eximius, cui multam salutem nuntio.
Igitur obijt vester ille Phil. Caroli, qui fuerat Prof. Altorfij : sed quid docebat dum
Altorfij doceret, an literas humaniores ? an Philosophiam ? Ubinam obijt, et quo anno ?
imò et qua ætate ? an Papista, an Monachus, an Iesuita, an conjugatus : scribe quæso
de singulis illis, et ignosce curiositati meæ : tot humani ingenij motus atque muta-
tiones miseriam et imbecillitatem nostram apprime patefaciunt. Habeto sodes
rationem sequentis Indiculi, ac emito mihi si occurrant. Danielis Wulferi Phœ-
nix Christianus : Phil. Caroli in Bibliotheca Romana : Io. Theod. Schenckij His-
toria plantarum generalis. 4. Ienæ, 1656. Quidquid scripsit Thesium aut libellorum
Eccardus Leichnerus, præsertim Anti-Haru. ut et de Calido innato : et ejusdem
Hypomnemata. Ubinam vivit iste Leichnerus ? Gratias ago pro libris mihi emptis,
designa pretium, et refundam. Hîc habeo Christ. Ruperti Mercurium Epistolarem : sed
propter tantum virum malo bis habere quàm carere : adjunge quæso Dissertationes politicas si prostent, Heidmanni. Cl. virum D. Rolfinkium saluto ; ejus Disputationes
expecto, et ejus Epistolæ respondebo : D. Mich. Horne Lipsiensem ex animo saluto, ut et omnes
alios veteres amicos vestrates. Vale, et me ama. Parisijs, 16. Maij, 1664. Tuus, etc.
