Ms BIU Santé no 2007, fo 191 ro.
Eidem.
Literas tuas per Genevam accepi, sed fasciculum Meibo-
mianum et Beyeranum in dies expecto. Dominum Kornmannum non vidi, sed hîc
absenti mihi tuam reliquit : si illum deprehendam, erit mihi commendatissimus
tuo nomine. Quis sit ille Secretarius regius, qui meo et Filiorum nomine Te adijt,
obtulitque vitam Io. Verjusij, planè nescio : ne patiaris quæso nomine nostro
Tibi à quoquam fucum fieri : fraudes ubique regnant, et impostores fraudum
artifices : nemini credas velim, nisi meo nomine proprióque scripto Tibi eum commenda-
verim. De bellico apparatu Batavorum adversus Anglos nihil habemus novi ;
ante finem mensis expectatur aut pax aut certamen. De re literaria nihil
hîc habemus novi : Tribus primis hujus anni mensibus, Ianu. Febr. et Martio,
viguit hîc, et vænum fuit expositum quoddam Scriptum typis mandatum, sub
hoc titulo, le Iournal des Sçavans : promotore quodam Senatore Parlamenti
qui dicitur Dominus de Salo : sed post tres menses, silentium ei Rex noster imposuit,
privilegium suum revocavit, vetuitque nequis eoidem opus prosequeretur :
dictum factum, et jubenti Regi fuit obtemperatum : isthæc inhibitio
multis ingrata fuit, quæ imputatur Papæ, Nuntio Apostolico, Iesuitis, et
alijs quibusdam Monachis : quamvis vera ejus causa nesciatur : sed multi sunt
hîc qui sperant istud Opus renovatum iri, idque cum bona Regis venia.
