Ms BIU Santé no 2007, fo 229 ro.
Clarisimo viro D. Io. Theodoro Schenkio, Med. Doct. et Prof. Ienam.
Accepi tandem, Vir Cl. post penè tres annos, duos illos tomos vestrarum Disput. Ienens.
qui diu latuerunt Francofurti, expectando vectorem idoneum : postea v. Parisijs etiam
latuerunt, me inscio et in dies frustra expectante : tandem Amicus quidam eos detexit, per quem mihi
redditi sunt : nunc pro ijs gratias ago Tibi singulares, et pretium quale volueris et indicaveris
accipes per Amicum meum singularem, D. Volcamerum, Medicum Noribergensem : Physica illa
Meletemata non recuso : Scholam tuam Partium humani corporis, ut et humorum lætus
hîc habeo. Historiam seri sanguinis, ut et Methodum componendi medicamenta videbo quum prodierint.
Lugduni vivit Meissonnerius, sed admodum vilis et inglorius, nullius rei, nullius nominis :
nec est tanti cuiquam iste scriptor : quidquid tamen optaveris, evocabo Lugduno, et mittam
per Amicum mercatorem ad D. Volcamerum, Noribergam. Ex scriptis Cl. viri Casp. Hofmanni,
quæ vir optimus moriens ad editionem procurandam mihi reliquerat, tandem, (nec citius potui propter difficultatem
temporum) tandem inquam, obstetricante Laur. Anisson, Bibliopola Lugdunensi, viro cordato,
et accurato, Apologiam pro Galeno emisi in lucem, cujus aliquot exemplaria misi Noriberg.
ex quibus unum accipies, et alterum D. Io. Theodorus Schenkius Guernerus Rolfincius. Mersennum illum, novi olim :
obijt anno 1648 æt. 60. scripsit in Genesim, et quædam Mathematica, quibus supra modum
delectabatur : cætera non novi, sed inquiram : hîc tamen habeo librum ejus Gallicum contra impietatem Deistarum, ut et alterum de veritate scientiarum : in hoc enim totus erat ut semper
et ex omni occasione inquireret in veritatem, ideóq. sæpe scribebat in Angliam, ad quosdam
Mathematicos. De vasiis lymphaticis nihil vidi præter ea quæ scripsit Bartholinus,
Danus, et Riolanus noster in Opusculis : Novitates istæ parum probantur à nostris, qui
toti sunt in curatione morborum, ut faciant rem, si non rem, quocumque modo rem : et qui
lucrum magis sectantur quàm verum. Thomæ Renesij sublimem eruditionem suspicio
et amplector : et utinam viveret vir optimus : Ille olim ad me scripsit, et ego ad ipsum :
ejus Epistolas hîc habeo in 4. cum aliquot Casp. Hofmanni : ex vestris nihil tam opto quàm
Academicas illas Orationes, et Theses Medicas aut Physicas : sed undenam possem habere
quandam Thesim in Germania olim editam, de abusu Theriacæ ? in eam inquirendi
studium suum olim mihi promisit Elsnerus noster : sed ubinam hodie vivit optimus
ille virorum ? Utinam in urbe patria sanus et incolumis rem faciat, et Nestoris annos attin[get.]
