À Johannes Antonides Vander Linden, le 4 mai 1663, note t.
Transcription

Ms BIU Santé no 2007, fo 146 ro.

29. April. Acceptilationem illam tuam D. le Rebours, quam habes penes Te, remittes ad me
quum volueris, vel eam trades cui volueris, ut inde pecuniam tuam accipiat,
quam hîc habeo : sin minus, trades eam Filio tuo, qui eam mihi reddet, et prout
jusseris, dictam summam accipiet mille duocentarum libellarum Turonensium.
Hîc agitur duplex rumor : unus de connubio Cæsaris cum virgine Hispana, junioris
nostræ Reginæ Sorore minore natu, et dominio Belgij Hispanici : alter de pace Cæsaris
cum Turcarum tyranno
, sed pudendis Orbi Christiano conditionibus, ea nempe lege ut
Cæsar Turcæ tradat aut relinquat ex Hungaria et Dacia quidquid voluerit. Miraris,
Vir Cl. certè ego stupeo : nec satis mirari possum gentis illius Austricæ infrunitam
superbiam ; dum fœdè paciscitur cum Turco, ut postea faciliùs Poloniam devoret, si tot
nobiles Poloni patiantur sibi imponi jugum superciliosæ gentis familiæ Austriacorum Principum.
Sed quid dicent viri boni, si tam bene et tam facilè conveniat Cæsari Christiano cum isto Rege tyranno
Byzantino ?
nónne putas inde Christianis viris sperandum superesse, ut ante paucos
annos redeant Saturnia regna ? certè ego metuo ne tandem pro sacris Biblijs, per
Christianorum Principum socordiam et discordiam, et tot Monachorum improbitatem,
Alcoranus nobis obtundatur : et postea Virgilius fiet Propheta, qui olim dixit :

Iungentur jam gryphes equis, ævóque sequenti,
Cum canibus timidi venient ad pocula damæ.

Reginæ Parentis morbus dicebatur imminutus, et febris duplex tertiana longe
lenior facta per fluxum hæmorrhoïdalem : sed ab ejus suppressione dicitur omnia recru-
duisse : nunc enim dicitur paroxysmi esse catastrophici, pulmoneique pedes, et œdematosa
crura, quæ metum ascitis incutiunt : et hi sunt rumores qui per Urbem sparguntur,
à Medicis aulicis, qui quod solent mercatores, ex Cic. vix unquam quidquam pro-
ficiunt, nisi admodum mentiantur, et adulentur Magnatibus, qui volunt decipi.
Turpiter quoque mentiuntur tales Medici dum attolunt morbum, quo pretiosius et
famosius curent : eò enim res Medicorum devenerunt in aula nostra, et totius Medicinæ dignitas
stat tamen fama, et patientia, ne dicam, maledicentia hominum. Sed aliàs plura.
Vale Vir Cl. et me ama. Parisijs, die Veneris, 4. Maij, 1663. Tuus ex animo G.P.

Imprimer cette note
Citer cette note
x
Correspondance complète de Guy Patin et autres écrits, édités par Loïc Capron. – Paris : Bibliothèque interuniversitaire de santé, 2018. – À Johannes Antonides Vander Linden, le 4 mai 1663, note t.

Adresse permanente : https://www.biusante.parisdescartes.fr/patin/?do=pg&let=1275&cln=t

(Consulté le 28/03/2024)

Licence Creative Commons