m | Musculus a pubis osse in femur procedens, in octaua figura Σ notatus. |
n | Hac prorepunt duo musculi, quorum alter femoris motorum sextus habebitur, atque in octaua tabula Θ notabitur : alter uero septimus, in eadem tabula Λ indicandus. |
o | Ab ilium osse pronatus musculus, qui tibiæ insertus, illius motorum primus est. |
p | A pubis ossium commissura enatus musculus, ac tibiam mouentium secundus. |
q | Sextus inter tibiam mouentes musculus, cuius carnosa substantia hic conspicitur : tendo autem ipsius adeo tenuis est, ut subiectorum illi musculorum circumscriptionem non obliteret. Quapropter etiam priuatim hic se non ostendit, quemadmodum neque in secunda musculorum figura : in tertia tamen et quarta, quadamtenus oculis subijcitur, in hac quidem charactere 3, in illa uero Φ notatus. |
r | Præsens musculus etsi cum alijs inibi ad superficiem repositis nuper dicto membraneo tendine sexti tibiam mouentium musculi obducatur, attamen sese ostendit, quemadmodum neque in musculosis integra adhuc cute conspectum fugit. Notat autem r priuatim septimum tibiam mouentium musculum. |
∫ | Musculus supra coxendicis ossis articulum principium ducens, et inter tibiæ motores nonus. Verum et hic membraneo obtegitur tendine musculi tibiam mouentium sexti. |
t | Musculus, femoris os uniuersum quodammodo amplectens, tibiæque ducum octauus. |
u | Sedes hæc u notata, ad sinistrum spectatur genu, estque quarti tibiam mouentis musculi pars. |
x,y | Tota hæc tibiæ ossis regio excarnis est, nulloque obtegitur musculo. |
z | Musculus pedis motorum ordine sextus, ac per transuersum ligamentum in anteriori tibiæ sede positum, et A indicandum, descendens, pedijque ossi pollicem sustinenti insertus. |
α | Musculus quatuor pedis digitos extendens, qui sub musculo z insignito, maxima sui portione occultatur. |
β | Quatuor digitos extendentis musculi portio, quæ pedi in anteriora attollendo suppetias ferens, pedem mouentium nonus censetur. |
γ | Pollicem extendens tendo. Carnosa enim musculi pars in alto alijs subijcitur musculis. |
δ | Transuersum ligamen in anteriori tibiæ sede locatum, et quatuor ultimo notatis musculis uiam porrigens. |
ε | Exterior malleolus, seu fibulæ excarnis pars. |
ζ | Musculus fibulæ exporrectus, qui sub pedis inferiora reflexus in pedij os pollicem sustinens insertionem molitur, ac pedem mouentium septimus numerabitur. |
η | Musculus, ab externo femoris capite pronatus, et pedem mouentium secundus. |
θ | Hunc characterem et aliquot subsequentes in dextro crure reposui, quod illis indicandi musculi in eo sint conspectiores. Verum θ notatur musculus ab interno femoris capite pronatus, pedemque mouentium primus. |
ι | Tendo totius corporis gracillimus, ab illo enatus musculo, qui ab externo femoris capite principium ducens, pedem mouentium tertius habetur. |
κ | Maximus suræ musculus, a commissura fibulæ ad tibiam enatus, pedisque motorum facile robustissimus, et quartus. |
λ | Musculus quatuor pedis digitorum tertium os flectens. |
μ | Portiuncula quoque hic uisitur, pedem mouentium quinti : uerum hæc, ut et musculi paulo antea in dextro potissimum crure commemorati, dilucidius multo in dextra sequentis tabulæ tibia conspiciuntur. |
ν | Transuersum ligamentum a tibia in calcem pertinens. |
ξ | Musculus pollicem in internum latus agens. |
ϖ | In dextro pede musculus notatur, pollicem alijs digitis adducens, seu illum in latus externum mouens. Apparent ad hæc, sub tendinibus musculi quatuor digitos extendentis, ac α notati, tendines indicem, medium et anularem in externum latus abducentes. |