PRÆSENS tabula quamplurimos præcedentis tabulæ musculos sectionis serie ademptos commonstrat, et deinde plerosque, qui prioribus figuris nondum in conspectum uenere, uidendos offert : quod omnes ad octauam usque musculorum tabulam subsequentes tantisper præstabunt, dum ossa anteriori facie nuda conspiciantur.
| Γ | Musculus temporalis, cuius principium semicirculo non absimile A,B et C circunscribitur. |
| D | Ossis iugalis externa sedes, quæ excarnis est. |
| X, E, F | Masseter. E huius musculi principium a malo exortum. F principij ipsius portio auri proxima. Cæterum ab E ad F totus ipsius principij ductus secundum iugalis ossis longitudinem metitur. |
| G | G infima musculi insertionis sedes notatur. Porro si triangulo hunc assimilare lubet, E, F et G tres angulos tibi proponere finges. |
| H | Neruulus minoris radicis tertij paris neruorum cerebri, hac frontis musculosam compagem petens. |
| I | Neruulus dictæ modo radicis ad superius labrum, et externam alæ nasi sedem propagatus. |
| K | Cartilago in quam sinistrum nasi os desinit. |
| L | Ala nasi sinistra dictæ modo cartilaginis extremo alligata incumbensque. Inter K et L narium cute iam ablata cum quibusdam membraneis ligamentis, in conspectum uenit interior alæ nasi musculus nimisquam tenuis. |
| M | Musculus a superiori maxilla inferiorem insertus, ac buccas mouentium unus. |
| N | Musculus sinister inferiori labro peculiaris, cuius sane corpus minori negocio, quam multiplex ipsius fibrarum intersectio delineari potest, quod etiam in musculo M notato usu uenit. Auris autem foramen citra O appositionem sese ostendit, uti etiam auris radici subditæ glandulæ hunc characterem quodammodo exprimentes. |
| O | Vix conspicua est eius musculi portio, qui inferiorem maxillam deorsum uellit. |
| P | Hac sede os reponitur υ imaginem referens. |
| Q | Musculus a temporum ossis processu styli formam imitante enatus, ac ossi υ simili insertus. |
| R | Musculus sinister ab inferiori maxilla in os υ referens, insertionem tentans, cuius coniunx nonnihil quoque hic se spectandum præbet. |
| S,T | Dexter et sinister ossis υ imaginem exprimentis musculi, a pectoris ossis summo pronati. |
| V,V | Musculus gracilis et longus, qui a superiori scapulæ costa ossi υ referenti implantatur. |
| Θ,X,Y | Musculus capitis motibus subseruiens, qui ab osse pectoris principium X notatum sumit, deinde aliam partem Y indicatam, a clauiculæ sede pectoris ossi proxima. |
| Z | Cæterum Z insertionem ipsius insinuat, qua uniuersum mamillarem capitis processum amplexatur. |
| a | Clauicula magna ex parte anteriori ipsius sede excarnis. |
| b | Musculi scapulam mouentium secundi insertio. |
| c | Musculorum hic magnam obscuritatem pariunt uasa caput adeuntia, et nerui in brachium excurrentes. |
| d | Musculus a clauicula in primam thoracis costam insertus, ac thoracem mouentium primus. |
| Ξ | Musculi brachium attollentis anterior pars, posteriorem decima ostendit tabula adhuc in sua sede repositam, ac Δ præcipue insignitam. Proxime autem sequens tabula anteriorem hanc partem ab exortu liberam reflexamque, ac γ notatam commonstrat. |
| e,f,g | Porro in præsenti figura e, f et g conspicuam hic musculi brachium attollentis partem, trianguli ritu describunt. |
| h | Musculi brachium pectori adducentis insertio, |
| Q,T,Δ | quam in dextro brachio Q et T notaui, et ipsi musculo Δ quoque imposui, quo hi characteres ad præcedentis tabulæ notas referantur, |
| K,L,R | ad quam quoque K, L et R spectant. |
| 1 | Pectoris os liberum ab initijs musculorum brachia pectori adducentium. |
| 2,3,4 | Secunda, tertia et quarta thoracis costæ, ad quas reliquæ seriatim subsequuntur, atque in harum interuallis exteriores musculi intercostales sunt obuij. Lineæ autem in costis ductæ, atque ad characterum sinistram consistentes, ossa costarum ab earundem cartilaginibus determinant, sunt enim illæ notæ cartilaginibus inscriptæ. |
| k | Musculus scapulam moventium primus. |
| l | Musculus thoracem mouentium secundus. |
| m | In dextra axilla m latitat, musculum notans, quo brachium deorsum trahitur. |
| n | Dextri lateris rectus abdominis musculus, hic altius quam oblique ascendentis musculi neruosa tenuitas conscendens. |
182