SEPTIMA musculorum tabula laxato fune, a quo inter pingendum pendebat, in posteriora tantum procidit, quantum uidendo septo transuerso sufficit : quod etiam in præsenti tabula ad sinistram ea forma appictum cernis, qua exectum, parietique suo lentore hærens nobis apparuit. Quo minus autem dextra scapula effractæ alæ ritu in deorsum decumberet, illam funiculo ita suspendimus, ut ipsius cauum in conspectu sit.
A | Gurgulio indicatur a palati termino propendens, inferiori interim maxilla prorsus amota. |
B | Aliquot ceruicis uertebrarum corpora. |
C,D | Primum par dorsum mouentium. |
E | Stomachi seu gulæ pars sub aspera latitans arteria, quam F notauimus. |
F | Cæterum uasa, quæ utrinque ad huius latera habentur congeries est, quam soporales efficiunt arteriæ cum internis iugularibus uenis, et sexto neruorum cerebri coniugio. |
G | Musculus alter secundi paris dorsum mouentium. |
H | Scapulam mouentium tertius. |
I | Musculus brachium mouentium quintus. |
Γ, K. | Musculus brachium mouentium sextus, cuius insertio K insignitur, reliquaque ipsius forma ex scapulæ imagine deprehenditur : quanquam si præsentis musculi triangularem figuram uolueris constituere, licebit K, L et L simul conferre. |
L,L | Musculus thoracem mouentium secundus. |
M | Brachium agentium tertius. |
N,N | Musculus cubitum extendentium, cuius initium superiori N insignitum a scapula educitur. |
O | Portio tendinis musculi, brachium mouentium quarti. |
P | Cubitum flectentium posterior. |
Q | Radium in pronum constituentium superior. |
R,R | Anterior cubitum flectentium. |
S | Radius. |
T | Vlna. |
V | Ligamentum inter radium et ulnam, qua inuicem dehiscunt intercedens. |
X | Radium in pronum mouentium inferior musculus. |
Y,Y | A dextro radio (qui cum uniuersa extrema manu magis quam sinistra attollitur) dependet, longior radium in supinum ducentium. |
a | Minor primum pollicis os flectentium. |
1,2,3 | Tribus his characteribus musculi notantur secundum pollicis os flectentes. |
b | Dependet musculus tertium pollicis internodium flectens. |
c,d | Musculus tertij quatuor digitorum ossis flexus autor, quem sedulo intuebere, quod illius tendinibus musculi attendantur, quatuor digitos pollici adducentes, quorum is qui indicem mouet, d insignitur, perinde ac reliqui tres ab insertione hærens. |
e,f | Quinetiam tendinum secundum quatuor digitorum os flectentis, musculi portiones adhuc servantur : ac portioni quidem indici propriæ e inscripsi, tendini autem tertium indicis os flectenti f. |
g,h | Cæterum in dextra manu dictorum musculorum conspiciuntur insertiones : ac g in indice insertionem indicat musculi indicem pollici adducentis. h insertionem musculi secundum os flectentis. |
i | i insertionem eius, qui tertij ossis flexioni præficitur. Præsentis tabulæ thorax, quod ad intercostales spectat musculos, præcedentis tabulæ thoraci respondet, unde etiam alijs characteribus non uenit obliterandus. |
Δ,k,l,m,n | Septum transuersum, cuius membraneus circulus in septo extra corpus expanso circunscribitur k, l, m, n quod uero exterius hos characteres ambit, atque foris (ut ita dicam) existit, fibrisque interstinguitur, carneam septi partem esse putato. |
o,p | Duo ligamenta, seu tendines septi, uertebrarum in lumbis consistentium corporibus inserti. |
q | Septi scissura, qua septum uertebrarum incumbit corporibus, ac magnam arteriam, uenamque coniugis expertem transmittit, aut illis cedit, quarum orificia q in corpore huius tabulæ positum indicat, quemadmodum et arteriæ ramos in septum excurrentes. |
r | Foramen stomacho uiam præbens, qui etiam r in corpore insignitur. |
∫ | Foramen uenæ cauæ caudici paratum, qui in corpore ∫ notatus conspicitur. |
t | Musculus femur mouentium sextus. |
u | Musculus dorsum mouentium nonus. |
x | Femur mouentium septimus. |
y | Sacrum os hic insignitur, neruisque aliquot ab ipsius medulla educti, obuij sunt. |
α | Femur mouentium octauus. |
β | Quintus femur mouentium. |
γ | Tibiam mouentium octauus. |
ε | Musculus pollicem a cæteris digitis amouens. |
δ | Dependet et hic quoque ab insertione musculosa moles, pollicem et tres ipsi proximos digitos in externum latus ducens. Quæ uero in præsentis tabulæ tibijs occurrunt, illis respondent, quæ prioribus tabulis fuere obuia. |