continentur. Vnde quibusdam musculis, in ipso exortu uentres potissimum habentur, ut qui ab ilium osse in femoris os inferuntur, alij ad finem, ac ad insertionem magis, quam ad caput, ut septum quod carnosius in extremis, atque ipsis adeo insertionibus, quam alibi conspicitur. Alijs musculis uentres statim ab ortu incipiunt, ut suram constituentibus. Alijs musculis uenter longius ab ortu conspicitur, ex quorum numero is est, qui brachium deorsum ad dorsum trahit, et unus inter tibiæ motores, qui a coxendicis ossis appendice enatus, suum caput diu neruosum nanciscitur, tibiamque mouentium quintus mihi habebitur. Alijs uenter per uniuersum musculi corpus permanet, ut intercostalibus, et illi qui ad brachiale repositus, radium in pronum agit, et laryngis non pauci. Atque ita aliqui musculi uentrem ad ipsam usque insertionem seruant, ut nunc postremo commemorati. Aliorum uentres longe admodum ab insertione distant, ut musculi illius, qui a femoris externo capite natus, in calcem tenuissimo longoque tendine fertur, et illi omnes qui ex cubito tibia'ue procedentes, digitorum motibus famulantur, et is qui membraneum tendinem, musculis secundum femoris longitudinem protensis obductum educit. Alij rursus geminum uentrem ostendunt, cuius generis musculi sunt, quos paulo ante inferiorem maxillam deorsum trahere, et quos a scapulis in hyoidis os pertinere dicebam. Deinde recto abdominis musculo ex abundanti quædam transuersim ductæ impressiones insunt, quæ illos musculos ita exornant, ac si pluribus uentribus efformarentur. Huiusmodi uero impressiones seu lineamenta, et circunscriptiones, quas Græci περιγραφὰς uocauere, sunt ueluti albæ quædam lineæ, in musculi alicuius substantia impressæ, quarum quum frequens nobis mentio incidet, non ab re feceris, si has in rectis musculis atque ijs etiam, qui sub stomacho latitant, in musculorum tabulis intueri non grauaberis.Musculorum impressiones Quæ a tendinibus sumi possent differentiæ, iam fere ex commemoratis etiam pendent.A tendinibus. Quidam enim in tendinem eneruationem'ue prorsus non desinunt, ut labrorum musculi, et rectum intestinum, et uesicæ ceruicem ambiens, et laryngis omnes, illis tantum exceptis, qui recto donantur situ, ac secundæ cartilagini tertiam committunt, hi siquidem in insertione nerueum quid commonstrant. At non solum illi qui aliud præter os mouent, tendinibus destituuntur, uerum (etiam si secus in primo de Musculorum motu Galenus sentiat) eorum quibus ossa mouentur, quam plurimi tendinibus carent, neque in insertione magis nerueum quid, quam omnes musculi in suis uentribus commonstrant. Est autem eius classis in manu, qui pollicem indici proxime adducit, dein duo qui primum pollicis os inflectunt, ac qui ad brachiale positus, radij motus in pronum autor est. Intercostales etiam musculi tendine priuantur, ut et ille grandis musculus, qui a scapula ortus octo superioribus thoracis costis inseritur, deinde is qui a clauicula in primam fertur costam. Atque ita etiam insignis musculus inter mouentes dorsum non infimus, qui ab ilium osse in uertebras lumborum, et infimam costam ducitur, flexionisque dorsi autor est, nullibi nerueum quid ostendit. His accedit septum transuersum, in insertione nullibi nerueam substantiam exprimens, præterquam ubi lumborum uertebris exporrigitur. Neque etiam in homine recti abdominis musculi, ubi costarum cartilaginibus implantantur, tendinem commonstrant, ut neque in simijs et canibus, quibus ad primam usque costam conscendunt. At in illis qua pectoris ossi exporriguntur, in medio ductu nerueam naturam habent, ac si inter illos prorsus reponendi essent, qui duos uentres exigunt. Neque etiam complures musculi, in occipitij os capitis motuum gratia inserti, tendinem magis in insertione, quam in ipsorum uentre ostendunt. Porro alij musculi tendines habent, ut eorum qui aliud, quam os mouent, sex oculi musculi, septimus enim in nerueam substantiam non desinit. Ex musculis ossa mouentibus omnes, qui ex cubito extremam adeunt manum, tendinibus ornantur. Tendinum autem quidam, lati membraneique sunt, ut sex oculi musculorum tendines, et obliquorum, et transuersorum abdominis. Alij omnino teretes, ut qui ex cubito procedentes, digitos flectunt. Alij paulo minus teretes, et latiores nonnihil, quam profundiores, ut tendo in calcem insertus, et tendo in latum cessans tendinem, priusquam brachiale attingit. Et alij tendines breues sunt, ut circumuertentium brachium musculorum tendines, et radium mouentium, qui circa mediam radij longitudinem insertionem habent. Alij autem longissimos edunt tendines, ut musculus ab externo femoris capite natus, et gracilem tendinem, priusquam genu articulum prorsus superauit, educens : quin etiam is qui latum in manu educit tendinem, et omnes qui ex cubito et tibia procedentes, digitorum motibus subseruiunt, et præter nonnullos tibiæ insertos, is etiam, qui ex ilium osse natus, in maximam membranam omnibus femoris amplexantibus musculis obductam desinit, ac tibiæ ossi, fibulæque inseritur. Musculi qui tendines educunt, illos alicubi ab extremo porrigunt. Temporalis tamen, ex sui corporis medio tendinem emittere, Galeno in Libris de Vsu partium dicitur. Quid autem hac de re sentiam, Capite de musculorum