extremum sectionem nouacula per cutem duces, deinde aliam in sincipite, secundum coronanalis[13]suturæ ductum, ad tempora, et aurium radices usque moliere.Prior. Ductis sectionibus, in altero latere, hamulo, aut summis digitis, cutis propter sectionum angulos (qui in elatissima frontis sede, et ipso fere uertice erunt) eleuanda est, ac simul cum carnea membrana ad supercilia usque auellenda, eodem prorsus modo, quo carneam membranam a subditis musculis separari superius relatum est.Posterior. At in alio latere, uarias easdemque transuersas sectiones experieris, donec relicta ad caluariam carnea membrana, cutem commode ab ipsa, ad supercilia usque adimas, iam in palpebrarum musculos incidens. Neque id tam factu arduum est, atque alij uidentur innuere dissectionis proceres, quum uti antea testatus sum, membrana non eo pacto cuti connascatur, ut unum ex ambobus simul confusis corpus consurgat.

Palpebrarum constitutio. PALPEBRAM utranque tam inferiorem, quam superiorem efformat membrana, quæ a caluariam succingente membrana principium ducit, et unum continuum cum adhærente alba'ue oculi tunica corpus existit, deinde et cutis quoque cum carnea membrana. Atque hæc simul ad palpebrarum fines, et ubi cartilago cilia erigens consistit, firmissime uniuntur adeo sane, ut quatuor hæc, cutis nimirum, duæ membranæ, et cartilago illa, quam tarsum uocauimus, simul unita, palpebram, corpus quoddam rarum, et nulli alteri in homine parti respondens constituant. Cæterum per reliquam palpebrarum regionem, cutis carnosæ membranæ, ut in cæteris fere omnibus corporis partibus, quod ad connexum attinet, committitur, at nullus interim adeps, sed unctuosus duntaxat quidam humor, inter cutem membranamque iacet.Duo palpebræ musculi. In superiori quoque palpebra secundum uniuersam ipsius amplitudinem ex abundanti, carnea membrana musculosis adaugetur fibris, ac uelut duos efficit musculos, in medio cutis et eius membranæ, quam adhærenti albæ'ue oculi tunicæ continuam esse diximus, repositos.Superiorem palpebram cur moueri oportuerit. Moueri enim oportebat ex nostro arbitratu superiorem palpebram, alioqui in nullum usum nobis accommodaturam. Etenim frustra palpebras Natura largiretur, si aliquando extrinsecus illato, uersus hominis oculos scarabæorum et cancrorum oculis longe molliores, quod percussurum ipsos, et læsurum esset, ex nostro arbitratu eas non clauderemus. Duos itaque tenues, latos, membraneos, ac substantia propemodum omni ex parte sibi similes, Natura miro quodam artificio musculos produxit, unum sane in maiori oculi ponens angulo, alterum in minori.Vnus musculus. Qui portionem maioris anguli occupat, ex media anguli sede inibi ad nasi latus incipit, suo principio etiam superciliorum partem naso proximam contingens. Huius finis amplus, quemadmodum totus etiam musculus, cartilagini, in quam pili firmantur, applantatur, mediam ipsius sedem, quæ maiorem respicit angulum, uniuersam occupans.Alter. Alter uero musculus totum minorem angulum amplectitur, ductum quodammodo circularem obtinens. A medio nanque inferioris palpebræ ortus, per minorem angulum circunducitur, et in superiorem palpebram ascendens, in reliquam cartilaginis dimidiam sedem sese inserit, priorique musculo, non ad cartilaginem tantum, sed etiam per reliquam superioris palpebræ longitudinem committitur adeo sane, ut nisi fibris ambos distinxeris, uterque unus esse apparebit. Fibræ enim secundi, nostro C, quum palpebra sursum ducta est, respondent, ea autem conniuente, acutum magis efficiunt angulum. Prioris uero musculi fibræ minus obliquæ conspiciuntur, et uelut ex duplici ducuntur principio, nimirum ex angulo maiori, et supercilij parte naso contermina. Horum musculorum beneficio superior palpebra et attollitur, et deprimitur. Prior enim ipsam ad superiora contrahit, posterior, qui minorem perreptat angulum, ipsam deorsum agit. Simul nanque semper attrahitur, tam altera tarsi pars, cui contractus musculus non implantatur, quam reliqua. Huius autem causa est, tarsi durities, si enim esset membranosus, uel carnosus, uel quomodocunque libet mollis, præterquam quod cilia non reseruaret erecta, motam partem,