Primi ac secundi duodecim præcedentis Capitis musculorum administratio. HORVM musculorum administrationem a latis ac ex carnea constantibus membrana musculis opportunissime auspicaberis, et primum acutiori nouacula in cute rectam sectionem, a summo mento, mediaque inferioris labri sede (ubi cutis in ruborem desinit) ad pectus usque, secundum colli longitudinem duces ita quidem ad amussim, ut sola cutis ad subiectum usque musculum, carneam'ue membranam diuidatur. Deinde alia ducenda est sectio, ad utriusque labri extremum, secundum ruboris finem sic, ut orbiculari linea os uniuersum obducatur. His alia per nasi longitudinem addetur sectio, et si prius frontis musculorum compagem, et palpebræ musculos aggressus fueris, nulla præter has (nisi sub aure ad medium usque occipitij) in facie sectio est ducenda. Alias enim ex summo narium, sub inferiori palpebra et aure, uersus occipitium transuersam moliri deberes sectionem. Cæterum a fine sectionis ad pectoris usque os ductæ, transuersa una sub clauiculis, et summo humero, et scapularum spina ad dorsum usque perficietur : licebit et his transuersam ex faucibus, seu ex gutturis regione, usque ad spinam adijcere. His tentatis sectionibus, hamulo cutis levabitur, ac in altero latere acutiori nouacula, cutis a subiecto membraneo musculo, omni industria liberabitur. Quod nullibi feceris molestius, quam ubi laqueus ceruicem compresserit, hic enim laquei occasione, cutis membraneo musculo pertinacissime connata reperitur, et etiam cutis instar cornu adeo inibi mox indurescit, ut uix nouaculam admittat.Corpus musculorum sectioni opportunum. Quanquam musculorum sectioni corpus opportunius adhibebitur, ex quo uenæ prius sectæ, uniuersum sanguinem in aquam calentem effuderint : quandoquidem tunc non toties uenæ sanguine inanitæ, dum musculos diuidis, uenient colligandæ, atque adeo frequenter spongijs abstergendæ. Ex altero autem cadaueris latere, una cum cute (quod factu facillimum est) musculum latum tenuemque auferes, atque utrinque musculi naturam, et fibras neruosque, ac munia (si hinc inde suas, quas prius enarrauimus, partes attraxeris) intuebere. Fibrarum autem huius musculi seriem, nequaquam oscitabundus in tota humiliore inserioris maxillæ sede præteribis, quin prius eas strumarum, uel ut uulgo dicimus, scrophularum gratia diligenter examinaueris, quo in eo abscessus genere, quum usus expetet, foelicius ac magis industrie tumentes glandulas exseces. Administratio enim sectionis in hoc affectu extra fibrarum ductum tentata, admodum obscoene hinc inde colli cutem aut tendit, aut corrugat. Vbi hæc igitur sedulo obseruaueris, eius lateris musculum, quem subditis corporibus adempta cute affixum reliquisti, omni ex parte adimes,Administratio 5,6,7,8. atque administrationem ad proprios labrorum musculos conuertes, qui in conspectum ueniunt, quamprimum adipem, qui his præcipue in buccarum regione incumbit, permisceturque una cum lato, qui ex carnea constituitur membrana, musculo ademeris. Liberabis itaque ab inferiori maxilla primum duorum, qui inferiori labro elargiuntur capita, sensim ea ad insertionem usque, ut fibras examines, deducens.Labrorum fungosa substantia. Atque hic labra fungosæ cuiusdam substantiæ interuentu, maxillæ ossi connata reperies, quæ labris opitulatur, quoties distrahuntur, tenuesque fiunt, et quoties contracta incrassantur, ac corrugantur. Quippe eiusmodi substantia omnino et inanitur, et repletur prompte : inanita quidem submittitur, repleta uero attollitur. Præter hanc substantiam occurrent et nerui duo, maioris tertij paris neruorum cerebri radicis ramuli, ex maxilla inferiori in eos, quos iam dissecas, musculos diffusi. Cæterum posteaquam inferiores liberati fuerint, a malis duos quoque superiores dissecabis, atque illis ad superius usque labrum deductis, quatuor musculorum functiones, capita huc illuc trahens spectabis.Administratio 9 et 10. Postremo musculo alæ nasi, et superiori labro communi a malis deraso, ac ad alam usque et labrum deducto, eius quoque usum contemplabere. Hic uolens prætermitto neruum minoris gracilioris'ue tertij paris neruorum cerebri radicis propaginem, ex superiori maxilla excidentem, ac nuper dictis musculis communicatum. Siquidem neruorum omnium seriem, quam dabitur, accuratissime in Quarto libro prosequar. Atque eadem ratione nullam neque uenarum neque arteriarum mentionem facio, etiam si lato musculo externa iugularis suffulciatur, quoniam Tertius liber Venis arterijsque dedicabitur. Integrum itaque est, ut confideres membranosa ligamina, narium alas alijs nasi cartilaginibus colligantia, et deinde mutuum earum cartilaginum connexum. Nam de narium tunica in Neruorum distributione similiter pertractabitur. In præsentia autem suffecerit adhuc sermoni adiecisse, tunicam illam, quæ narium amplitudinem