nimirum ut et basis linguæ sit firma, et linguæ finis prompte quoquouersum pertingat. At uero si ligamentum in modicam linguæ partem procederet, minus quidem, quam si omnino factum non fuisset, sed proxime, et propemodum similiter linguæ incommodaretur : si rursus idem ad plurimum linguæ spacium pertingeret, neutiquam ad palatum, neque ad superiores dentes, neque ad alias multas oris sedes lingua extenderetur. Tam igitur exacta est uinculi commensuratio, ut siue adieceris, siue abstuleris aliquid, quantumuis exiguum, uicietur totius linguæ functio, quod in dies in artis operibus experimur, quoties id ligamentum præscindimus, aut propter nimiam humiditatem laxum resiccamus.
QVONIAM in integris musculorum tabulis in præsentis Libri initio seriatim positis, omnes laryngis musculi oculis subijci nequierunt, non abs re fore putaui, in huius Capitis fronte priuatim laryngis musculos, hac figurarum copia exhibere.
[Illustrations]
PRIMA figura ossis υ imaginem referentis, et hic suis musculis omnibus liberati anterior facies exprimitur, una cum anteriori laryngis, et asperæ arteriæ caudicis (qui in collo consistit) sede, nullo interim laryngis musculo resecto. Qui uero musculi hic sint conspicui, characterum index dilucide explicabit.
Secunda figura eadem, quæ prima ex dextro latere commonstrat, quanquam hic non tantam asperæ arteriæ caudicis portionem asseruauerimus, dein etiam hinc superiora ossis υ referentis latera resecuimus.
Tertia secundæ penitus respondet, nisi quod hæc ex posteriori facie eadem, quæ illa ex latere commonstrat, uerum et hic quoque ex industria superiora ossis hyoidis latera adhuc delineantur.
Quarta anteriorem laryngis sedem, cum portione caudicis asperæ arteriæ proponit, resecto iam hyoide osse, cum musculis ab illo, et a pectoris osse, laryngi oblatis. Seruantur itaque adhuc ex communibus laryngis musculis, quintus et sextus, ac dein musculi laryngis operculo proprij.
256