longissimo dorsum mouentium musculo, ex posteriori ossis sacri regione, et interiori ilium ossis sede, quam extra sacrum os in posteriora prominere nouimus. Hinc cum undecimo dorsum mouente musculo, transuersis uertebrarum lumborum processibus innixus, sursum deducitur, tam pertinaciter toto per lumbos ductu illi musculo commixtus connatusque, ut merito ipsius pars censeri queat, neque facile ab ipso sectione dirimi possit. Quum primum uero uterque duodecimam thoracis respicit uertebram, sextus hic musculus a dorsum mouente undecimo, notatu digno interuallo abscedit adeo, ut inibi incuriose secantibus ex illo principium sumere uideretur. Hinc modice obliquus sursum in latus conscendit, et decem superioribus costis, ex carnosa sua substantia tendines paulo minus toto teretes pullulat, non perpetuo carneis constans partibus, quantunuis etiam Galenus hunc undique carnosis partibus constare in Quarto de Administrandis sectionibus libro prodiderit. Inseruntur autem illi tendines costarum tuberculis, quæ ex ipsis paulo postea, quam a transuersis uertebrarum processibus abscesserunt, extuberare relatum est. Cessat autem musculus hic ad primam thoracis uertebram, interdum tamen adeo conscendit, ut et transuerso septimæ ceruicis uertebræ processui tendinem quoque non minus, quam costis offerat. Undecimæ et duodecimæ costæ carnosus duntaxat inijcitur, quo enim altius musculus ascendit, eo nunc dicti tendines magis euadunt conspicui, ipseque musculus quasi a tendinum generatione absumptus, sensim gracilior redditur, eas infimas thoracis costas, et omnes reliquas deorsum trahens, easque comprimens, ac denique thoracem arctans.Hominis 5. Simiarum 7. Septimus musculus, homini pariter et cani communis in posteriori thoracis sede, secundum inferiora collocatur, originem ducens membraneam latamque, ex undecimæ et duodecimæ ac aliquando decimæ thoracis uertebrarum spinis, tum aliquot etiam primarum lumborum uertebrarum spinis. Principium hoc musculis dorsum agentibus, et quarto humani thoracis super sternitur, transuersim recta in priora porrectum. Vbi autem septimus musculus hos transcendit, costarumque ossibus committitur, statim carneis adaugetur fibris, et tandem uelut in aliquot diuisus digitos, nonæ, decimæ, undecimæ et duodecimæ costarum interuallis, ipsisque costis sese inserit, implantatur uero ipsis multo ante, quam in cartilaginem cessant. Atque hic musculus hominibus longe latior est, quam simijs et canibus, quanuis etiam in canibus insignior, quam in simijs uisitur, et in omnibus serratam quoque compagem, cum abdominis musculo oblique descendente efformat. Musculus iste retractionis earum, quibus inseritur, costarum opifex est, unde etiam thoracem distendentium numero opportune asscribitur.Hominis 6. Simiarum 8. Octauus hominibus ac simijs et canibus communis, in thoracis cauitate situm sibi peculiariter uendicat, extenditur autem per uniuersum pectoris ossis latus, sub tota uerarum costarum cartilaginum regione, propemodum costarum os, exteriori ipsius latere contingens. Est autem musculus iste triangularis, ex duobus longissimis lateribus, et uno breui constructus, et tenuis, omnique ex parte carnosus. Fibras sortitur obliquas, ex ossis pectoris lateribus, sursum in posteriora protensas, nisi fortassis mauis asserere, ipsas a costis ad pectus, a posterioribus deorsum in priora ferri, huncque musculum huius sedis intercostalibus annumerare. Adnascitur autem omnibus uerarum costarum cartilaginibus, illas ad pectoris os, in sinus nimirum, quibus illæ inarticulantur, attrahens, et eo motu thoracem quoque arctans, et costarum cartilagines inuicem colligans.Intercostales musculi utrinque triginta quatuor. Supersunt præter utrique lateri communem adhuc, utrinque duo et uiginti, ac deinde duodecim. In singulis enim costarum interuallis, quæ undecim in alterutro latere sunt, bini producuntur musculis, unde et intercostalium musculorum nomen mutuantur. Siquidem ad illorum generationem, per totam costarum longitudinem, ab inferiori regione superioris costæ, in superiorem humilioris, et in descensu proximæ sedem, neruosæ quædam fibræ deorsum producuntur. Et rursus a superiori parte inferioris costæ, aliæ fibræ in inferiorem alatioris costæ sedem oblique sursum procedunt sic sane, ut in singulis costarum interuallis duo inter costales musculi habeantur, qui mutuo incumbunt, ac fibras decussatim prorepentes sortiuntur, et per uniuersum interuallum semper carnosi permanent, nec ob loci angustiam in tendinem cessant. Ac proinde inter costalium musculorum alios exteriores, alios uero interiores non inepte dicimus.Externi intercostales. Externi in singulis costarum interuallis, simulatque costa a transuerso uertebrarum processu, in anteriora oblique prorepit, principium habent ac fibris constant ex superiori costa, in inferiorem oblique in priora deorsum proreptantibus. Hunc fibrarum ductum, per uniuersa spuriarum costarum interualla, tam quæ inter ossa, quam quæ inter cartilagines consistunt, exteriores musculi seruant, et uerarum costarum musculi, usque ad costarum partem, qua in cartilaginem finiunt, eam quoque retinent. Vbi autem uerarum costarum ossa in cartilaginem degenerant, mox fibrarum ductus uariat, ab inferioris nanque costæ cartilagine, sursum in priora oblique, uersus superioris costæ cartilaginem fibræ inibi procedunt, donec et in hac parte exterior musculus