PRÆCEDENTEM paginam occupans tabula, quatuor complectens figuras numero insignitas, non huic tantum Capiti, uerum etiam et alijs plerisque utilis erit. Ne uero dein pluribus præfigenda sit Capitibus, hic omnes suarum notarum indices sum explicaturus.
1 | Prima itaque figura corporis in mensa proni, et oculo ad perinæum, seu interfemineum directo, ostendit femora in latera admodum distensa, et penis corpus uniuerso interim scorto cum testibus, cute, adipe; uenis, neruis, et arterijs undique absectis. |
2 | Secunda figura nuda quodammodo commonstrat ossa, quæ sacri ossis lateribus committuntur, ac ilium et coxendicum et pubis ossa appellantur. His femorum ossium portiones adhuc appendent, una cum ani et penis musculis : quos ideo ab ipsorum exortudependere finximus, ut penis corporum origo urinæque et semini communis meatus inibi in conspectu esset, qua sursum sub pubis ossibus flectitur. |
3 | Tertia, penem transuersim dissectum in hoc ostendit, ut penis corporum substantia, et coalitus, et cum urinæ meatu connexus oculis subijcerentur. |
4 | Quarta figura integrum commonstrat penem, una cum uesica hic exporrectum, ut proprius uesicæ ceruicis musculus intueri possit. |
A,B 1,2,3,4 | Duo penis corpora, penem quodammodo uniuersum constituentia. |
C,C 2,4 | Duorum penis corporum exortus. |
D 1,2,3,4 | Penis glans, quam alij præputium nuncupant : eo nomine cutem, qua penis obtegitur, non dignantes. |
E,E 3 | Fungosa rubraque penis corporum substantia. |
F 3 | Mutuus penis corporum connexus, et neruea eorundem substantia, quæ orbiculatim fungosam substantiam complectitur. |
G 1,2,3,4 | Vesicæ meatus, urinæ seminique genitali communis. |
H,I 1,2 | Duo primi penis musculi, in prima quidem figura suam seruantes sedem, in secunda autem ab eorundem principio dependentes. |
K,L 1,2 | Duo posteriores penis musculi, seu tertius et quartus, qui in prima figura integri, in secunda uero ab insertione pendentes conspiciuntur. |
M 1,2 | Musculus orbiculatim recti intestini finem ambiens, fæciumque excretioni præfectus. |
N, 4 | Vesicæ ceruicis musculus, urinam, ne præter nostrum arbitrium defluat, cohibens. |
O,O 2 | Membrana pubis ossium foramina occupans. |
P, 2 | Teres ligamentum, a coxendicis osse in rotundum femoris caput insertum. |
Q 4 | Vesicæ corpus. |
R 4 | Glandosum corpus, uasorum semen deferentium insertionem excipiens. |
S,S 4 | Portiunculæ sunt meatuum, quibus urina e renibus in uesicam ducitur. |
T,T 4 | Portiunculæ sunt meatuum, semen in uesicæ ceruicem eiaculantium. Musculus autem in prima figura femur amplexantes, characteribus non insigniuimus, quid illi in musculorum tabulis diligentissime annotati fuerint. |
Penis constitutio. ETSI penis constructionis enarratio in quintum librum, ubi generationis organa persequentur, opportune reseruanda ueniet, nihilominus tamen in præsenti tantam huius mentionem facere expedit, quanta ad musculorum penis descriptionem ex usu est. Penem itaque præter cutem qua inuoluitur, duo grandia, et neruea, et intus spongiæ modo caua efformant corpora, quorum dextrum a pubis ossis dextri sede enascitur, paulo inferius quam ubi inuicem pubis ossa dehiscere incipiunt : hoc uersus sinistrum latus modice exporrectum, cum sinistro coit corpore, a pubis osse sinistro principium ducente. His corporibus tota penis constat moles : atque hæc corpora ad inferiorem ipsorum sedem, qua coëunt uesicæ meatum sibi toto ipsorum ductu ad glandis usque radicem subnatum exigunt, ubi canalem hunc urinæ seminique communem, corpora illa in unum prorsus corpus confusa amplexantur, quemadmodum quinto libro auditurus es prolixius. Nunc enim ad quatuor musculorum descriptionem, modo dicta, abunde sufficiunt.Primi duo penis musculi. Ab anteriori itaque sede anularis musculi, quem recto intestino ut excrementorum præsit egestioni obnatum esse