et quemadmodum falsos tibiæ motus sibi effinxit, ita quoque musculum aliquem sua imaginatione excogitatum, nobis tradidisse. Tres qui adhuc enarrandi supersunt, dilucidius fortassis recenserentur, si quem Galenus postremum numerat, nunc septimi loco describeremus : uerum quum hoc Capite Galeni ordinem sequi uisum sit, eos etiam qui adhuc reliqui sunt, sua serie aggrediamur postea in horum omnium administratione, uti nobis consultius uidebitur, omnes dissecturi.Septimus Septimus itaque neruea lataque et ampla origine ab externo femoris ossis latere nascitur, totam radicem magni femoris processus in orbem amplexus. Origo hæc statim ab initio crassa carnosaque efficitur, et ilico a femoris osse abscedens, illi insternitur musculo, quem octauum nominabimus. Is nanque aliqua sui portione huic septimo subtensus in causa est, quo minus septimus tota femoris longitudine ipsius ossi, quemadmodum octauus, adnascatur. Septimus itaque musculus sua amplitudine totum externum femoris latus citra omnem, præterquam in exortu, ad os connexum amplectitur, magnam quoque anterioris et posterioris sedis femoris partem occupans. Hic toto descensu carnosus uisitur, paulo supra molam aut patellam in amplum tendinem desinens, quem octaui musculi et noni tendinibus commixtum, simul cum illis patellam appræhendere, atque tandem in anteriorem tibiæ sedem inseri audies. Quanquam etiam septimi musculi tendinis posterior pars ualide sexti musculi permiscetur tendini, qui præ cæteris femur amplexantibus musculis huius septimi externam sedem integit. Posteriori autem septimi sedi quartus huius Capitis musculus adtenditur, quemadmodum anteriori is qui nonus omnium futurus est. Quotus uero ordine iam septimus musculus in præscripta Galeni oratione habendus sit, ubi et duos alios adhuc absoluero, ipse augurabere.Octauus Octauus musculus totam propemodum femoris ossis amplitudinem succingit. In posteriori enim duntaxat sede iuxta femoris longitudinis medium, nudam relinquit lineam, cui maximus totius corporis musculus, seu femur mouentium quintus, inseri docebitur. Dein ad radicem quoque inferiorum femoris capitum, posteriorem quoque femoris amplitudinem octauus hic musculus non integit, cuius principium a femoris ossis ceruice nerueum exoritur : sed sensim carne adauctum, a femoris quoque magni processus radice ipsius portio ita enascitur, ac si eius obliqui ductus gratia, duo principia obtinere non inepte diceretur : ac unum quidem femoris ceruici, alterum uero magno illius processui ferendum esset acceptum. Vtcumque sit, musculus obliqua hac et ampla origine enatus deorsum descendit, uti diximus, femoris os adeo ambiens, ut duo ipsius latera in posteriori femoris regione paulo minus toto sint contigua. Quo uero magis descendit, crassior semper carnosiorque efficitur, quousque ad internum latus anterioris in femore regionis, quodammodo in crassum et admodum carneum semicirculum propter patellam extuberet, ex quo latus ualidusque enatus tendo patellam, sicuti paulo post dicam, amplectitur. Hic musculus tota ipsius longitudine e directo semper illius carnei semicirculi et ceruicis femoris carnosior crassiorque apparet, quam qua septimo musculo substernitur : sub illo enim tenuior euasit, attamen carnosus inibi quoque permanet. Quando itaque secundum femoris longitudinem in anterioris ipsius sedis interno latere octauus musculus procerius extuberat, et septimi quoque anterior pars e directo lateris exterioris eius sedis femoris quæ anterior est, exporrigitur, in medio anterioris femoris sedis septimus una cum octauo sinum efformant impense liuidum, cui tota femoris longitudine musculus innititur, quem ordine nonum esse dicam, simulatque octauum musculum in Galeni oratione proculdubio primum esse addidero : quandoquidem adhuc quodammodo carnosus molæ seu patellæ inijcitur.Nonus Nonus (cui Galenus exortus sedem perperam assignat) non ex femoris osse enascitur, uerum ex ilium ossis tuberculo, in anteriori ipsius regione super coxendicis ossis acetabulum prominente. Ab hoc enim tuberculo nonus musculus principium nerueum acutumque assumit, quod deorsum recta in femoris anteriora descendens, lacertæ murisque formam adipiscitur carnea substantia auctus, et illi sinui incumbens, quem septimum musculum cum octauo efformare nuper retulimus. Priusquam uero nonus medium longitudinis femoris descendendo superarit, arctior graciliorque sensim efficitur, ut multo supra genu articulum in tendinem finiat, utcunque amplum, sed tenuem : qui recta patellam accedens, in anteriori ipsius sede denuo dilatatur, tendinibus septimi et octaui musculi permixtus. At tamen hic tendo alijs non adeo ualide, atque septimi et octaui musculi tendines inuicem, connascitur : quandoquidem transuersis, quæ nouacula ducuntur, sectionibus, non admodum laceratus, a subditis tendinibus ad anteriorem usque tibiæ sedem auelli potest. Vtcunque sit, hic ex tribus postremo enarratis musculis, unus tendo conflatur, cui patellæ corpus uniuersum innascitur. Nihil enim ipsius patellæ tendine non abducitur, præter interiorem ipsius sit perficiem, quæ læui cartilagine incrustata, sinum inferiorum femoris capitum respicit, mutuoque