Pedis motus. VNIVERSVM pedem perinde ac extremam manum flectimus, et extendimus, et deinde in latera (quamuis interim obscurissime) ducimus, idque plurium et diligentissime ob crebra quæ ipsis contingunt uulnera distortionesque obseruandorum musculorum beneficio. Qui uero articuli his motibus subministrent, in pedis ossium enarratione, superiori libro non obiter percurrimus : hic autem pedem mouentium musculorum numerus a posteriorem tibiæ sedem occupantibus, opportune inchoabitur.Primus pedem mouentium. Primus itaque a radice interni femoris capitis unico enascitur principio, si modo ipsius continuitatem spectes : si autem substantiæ animum attenderis, id principium duplex apparebit : unum quidem superius, et magis iuxta femoris medium interius : alterum uero inferius, et nonnihil exterius, pari omnino modo, quo rectum abdominis musculum enasci retulimus. Superior nanque principij huius musculi pars carnea lataque est, et deorsum protensa, paulo sub genu articulo cum reliqua initij parte confunditur, quæ exacte neruea liuidaque in exortu erat, et deorsum recta per genu articuli posteriora descendens, ualde carneum crassumque efformat musculum, qui formam exacti (ut sic dicam) musculi resert.Priusquam uero musculus iste ad medium tibiæ longitudinis iam angustior redditus pertingat, carnosus esse desinit, et ex suæ inferioris partis amplitudine tendinem latum educit, in cuius medium aliquandiu adhuc carnosa musculi pars porrigitur.Secundus. Atque hic musculus in interno latere posterioris tibiæ sedis ducitur : in externo autem latere secundus musculus consistit, qui similiter ac primus ab externo femoris capite enatus, deorsum fertur, omni ex parte primo musculo similis. Quum uero utrique a femoris capitibus deorsum tendunt, non procul ab exortu sese contingunt, inuicem fibrosis nexibus hærentes. At quo magis deorsum prorepunt, eo ualidius connascuntur, ut iam tendo, quem singuli producunt, unus omnino sit, ab utrisque enatus musculis. Interior tamen, seu primus musculus nonnihil diutius carneus, quam secundus, deorsum ducitur, quod in musculosis citra confectionem est euidentissimum. Duo enim in sura prominentes musculorum uentres, carneæ partes sunt præsentium musculorum, suræ magnam molem efformantium. Tendo autem ab ambobus musculis enatus, et paulo angustior redditus, in caudatis simijs in posteriorem calcis sedem ualidissime inseritur. In hominibus uero non multo sub carnosa musculorum sede, subiecto cuidam musculo adnascitur, quem quartum inter pedis motores recensebimus. Atque hic connexus adeo est pertinax, ut nulla ratione hunc tendinem ad calcem usque a subiecto musculo dirimere queas, et asserere cogaris, ab hoc tendine et quarti musculi tendine, unum efformari in posteriorem calcis sedem insertum.Lib. 2 de Administrandis sectionibus. Ac proinde etiam Galeno succensebis, dum alios sectionis professores falso increpat, quod duorum primorum musculorum tendines tertio cuidam tendini commisceri, neque alteri non connexos in calcem inseri scripserint. Hoc nanque uere de hominibus illi prodiderunt, parum soliciti, num tendines secus in simijs calci implantarentur.Tertius Tertius musculus ille est, quem superiori Capite tendinem insigniter gracilem producere diximus. Ab externo enim femoris propter genu articulum capite teres enascitur principium, iamiam in ipso exortu carneum et gracile. Ab ortu tamen non ita procul dilatescit, exacti musculi uentrem utcunque crassiusculum referens : uerum mox sub poplite uenter iste gracilescens, summe gracilem tenuemque educit tendinem, qui quemadmodum et musculi uenter, sub duobus nuper commemoratis musculis occultatus, et super quartum expansus, sensim onlique deorsum prorepit, quousque ad internum duorum primorum musculorum tendinis latus elabatur, ubi is quarto musculo ualidissime connecti incipit. Tertij musculi tendo hinc deorsum ad internum usque calcis latus fertur, iuxta posteriorem calcis sedem ipsi implantatus, non autem pedis plantam subiens, illius musculi modo, quem in simia latum plantæ tendinem educere prius recensui.Quartus. Quartus non solum suram constituentium musculorum, uerum etiam omnium tibiam amplexantium maximus, posteriorem tibiæ regionem sua amplitudine occupat. Enascitur enim ex posteriori sede coarticulationis fibulæ ad tibiam, nerueo et ualido initio, quod deorsum modice ductum adeo dilatescit, ut latitudinem tibiæ ossis et fibulæ uincat : non tamen æque crassus est, ac latus amplus'ue. Ex hac uero amplitudine priusquam medium tibiæ longitudinis superauit, sensim arctatur, et paulo supra calcis regionem in ualidissimum et crassum degenerat tendinem, non solum ab ipso formarum, sed etiam a primi et secundi musculi tendinis concursu. Ex tribus itaque his musculis procreatus tendo, uniuersæ posteriori calcis sedi implantatur,