musculorum in utrisque esr series. Vnde etiam in illorum descriptione non inopportune eundem ordinem, quem in manus musculis obseruauimus, aggrediemur.Primus pedem mouentium. Primus itaque in futurus est, qui quatuor digitorum secunda flectit internodia, in hoc a manus musculo uarians, quod breuior sit, et pro sua mole amplior et tenuior, quodque non ex tibia (quemadmodum musculus digitorum manus e cubito) porrigitur. totus nanque infernam duntaxat pedis sedem occupat, uniuersæ ipsius carnosæ substantiæ pertinaciter subnatum habens ligamentum, quod lati in manu tendinis uices gerere, iam antea proditum est. Ab inferna itaque calcis ossis sede, et anteriori illius calcis tuberculi parte, quod terræ innititur, primus hic musculus principium ducit, partim nerueum, et partim carneum, quod ilico ab exortu prorsus carnosum euadens, sensim dilatatur, multo latius, quam crassius redditum. Quum uero mediam pedis longitudinem ad digitos repens superauit, in quatuor carnosas portiunculas dirimitur, quæ inuicem diductæ, et æquales constituentes angulos, singulæ unum producunt tendinem, ad sibi præpositum digitum excurrentem. Tendo iste similiter ac in manu, ad primi internodij radicem transuerso ligamento excipitur, quousque longa sectione diuisus, et subiecto sibi tendini uiam præbens, in secundi internodij radicem implantetur, et toti ossis sui longitudini latescens innascatur. Huius musculi beneficio, secundum quatuor digitorum flectimus articulum, eum quam possimus proxime ad calcem recta linea protrahentes.Secundus et tertius. Secundus uero et tertius digitorum musculi, tertij quatuor digitorum et secundi pollicis articuli flexus opifices sunt. Atque hi non in pedis planta reponuntur, sed in tibiæ posteriori sede locati, totam illius longitudinem perreptant. Sunt porro hi, quos quarto pedem mouentium musculo, qui suram constituentium maximus est, proxime substerni, et quinto pedis musculo incumbere diximus. Vt uero eandem cum quinto pedis musculo sedem occupant, ita quoque illi forma admodum similes sunt : latiores enim quam spissiores uisuntur, deinde toti carnei in tibiæ regione existunt : et quum ad calcem usque descendere, ab interno tantum latere non admodum prius arctati, teretem promunt tendinem, peculiari sinu et transuerso ligamento, inter tibiam et calcem, inferiora pedis subeuntem. Eorum itaque prior, qui digitos mouentium secundus censebitur, a posteriori sede connexus fibulæ ad tibiam, enascitur, statim ab ortu carnosus, et latus utcunque, uersus tibiæ extremum prorepens. Toto hoc progressu, maximo suram efformante musculo contegitur : anteriori autem parte qua tibiæ posteriorem sedem respicit, fibulæ posteriori parti attenditur, ipsi etiam aliquandiu adnatus : deinde qui ordine tertius futurus est, externo suo latere ipsi secundo hic quoque subijcitur. Ilico uero atque secundus ad infimam tibiæ sedem descendit, ab interno ipsius latere tendinem edit teretem, qui prius aliquandiu in carne pronasci uisus est. Huius tendinis nomine ad internum calcis latus, ubi talum excipit, sinus insculpitur, qui transuerso ligamento obductus, præsentis musculi tendinem tutissime deducit. Postquam tendo ligamentum id superauit, pedis inferiora oblique subit, et inter illos qui quatuor digitos pollici adducere dicentur, et eos qui primum digitorum internodium flectunt, prorepit, totus propemodum ad pollicem contendens. A præsenti enim tendine ad plantæ fere medium portiuncula diffunditur, quæ aliquot tendinibus eius quem tertium numerabo commiscetur, atque una cum illis tendinibus ad tertij indicis, et quasi ad medij quoque digiti, articuli flexionem auxiliatur. Reliqua autem tendinis secundi digitos mouentium musculi portio (quæ profecto ualidissima est) ad pollicem uti diximus oblique perfertur, atque secundum pollicis longitudinem transuerso ligamento exceptus, in secundi pollicis internodij longitudinem lata insertione implantatur, eius internodij flexionis autor. Tertius musculus, qui quinto pedem mouentium insternitur, pari prorsus ratione cum secundo digitorum musculo in posteriori tibiæ sede exporrigitur ad internum magis latus, quam secundus, respiciens : longe enim magis tibiæ ossi, quam fibulæ innititur. Quum autem ad calcem fere descendit, atque adhuc latus conspicitur, ab interno ipsius latere teretem promit tendinem, cui peculiarem sinum et transuersum ligamentum Natura fabrefecit, in medio duorum qui hic quoque habentur sinuum. Tertij itaque musculi tendo, hoc ductus sinu, teres adhuc pedis inferiora subit, secundi musculi tendini uersus plantæ cutem magis subiectus, et cum illo X literæ imaginem efformans. Secundi enim musculi tendo ab exterioribus introrsum oblique in anteriora fertur : tertij autem tendo quodammodo ab interioribus extrorsum contendit, ob idque in plantæ medio cum secundi tendine decussatim constituitur. Tertij musculi tendo pedis plantam hoc modo subintrans, modice dilatatur, ac in quatuor alios tendines digeritur, singuli ad unum quatuor digitorum excurrentes, illisque manus tendinibus respondentes, qui tertium quatuor digitorum articulum inflectunt. Sub primi enim musculi tendinibus occultati,