ac peculiari ipsius transuerso ligamento longa sectione diuiso, ad insertionem usque musculus ille ducetur. Cæterum iam opportunum est, et anteriores tibiæ musculos aggredi, atque hic omnium primum transuersum ligamentum sectione per longum facta diuidere conuenit. In quo opere magna tendinum congeries sese exhibebit, quorum (ut singulos ordine intuearis) primum tendinem attolles, pedem mouentium sexti.Sexti pedem mouentium. Huius musculi caput aliorum musculorum modo, ab exortu liberatum, ad insertionem usque ducendum est : quod mediocri fit negocio, si utrinque musculi latera ab ipsi connatis cultello aut nouacula diuiseris.Decimi quarti digitos mouentium. Post hunc totus sese ostendit quatuor digitos extendens musculus, una cum portione illa, quam nonum pedem mouentium recensui.Decimi quinti. Vbi hic a tibia liberatus ad insertionem ductus erit, is aggredietur qui pollicem extendit, quem similiter a tibia liberatum ad insertionem ducere expedit.Septimi et 8 pedem mouentium. Supersunt in tibia duo pedis motibus famulantes musculi, qui fibulæ exporriguntur. Horum sectio a ligamenti transuersi inter calcem et fibulam positi dissectione inchoabitur, et deinde tendinibus elevatis, uniuersum musculorum corpus a fibula dirimetur, ut postmodum ipsorum insertionem liquido uideas,Decimi sexti digitos mouentium. ac demum musculos, qui superiorem pedis sedem occupant, suis principijs liberatos ad insertionem perducas, atque ita uniuersæ musculorum fabricæ una nunc mecum summam manum imponas, ac ligamentorum quæ adhuc reliqua sunt naturam spectes. Atque horum omnium administratio proprium nihil, aut peculiare exigit.Ligamentorum adhuc reliquorum administratio. Si enim iam ligamenta ex latere ossis sacri, ubi quintum os sexto committitur, prodeuntia inspexeris, una cum membrana pubis ossis foramen occupante, integrum erit ilium os a sacro, impetu abrumpere, et commissuram ambiens ligamen simul cum cartilagineis ligamentis intueri. Mox ad coxendicis articulum accedens, orbiculatim illum ambiens ligamentum acutiori cultello transuersim diuidito, atque eius crassitiem, sed præcipue ortum et insertionem, inspicito. Si modo femur in exteriora modice duxeris, ex acetabulo ipsius caput elabetur, et teres ligamentum se spectandum exhibebit. Hoc transuersim dissecto, acetabulum accurate obseruandum uenit, propter iam commemorati ligamenti insertionem, et id ligamentum quod sinum augere diximus. Priusquam uero genu ligamenta administrentur, opportunum est perpendere, anteriori articuli sedi præter patellam, cum extendentibus tibiam tendinibus nullum ligamentum præponi. Id enim ubi constabit, exterius ligamentum a femoris capite liberatum ad fibulam deduces. Post hoc internum quoque a femoris interno capite liberatum, similiter uersus anteriora tibiæ dissecabis. Posterioris uero regionis ligamentum opportune a tibia dissectum, ad ipsius in femur insertionem perduces. Diuiso postmodum ambiente articulum ligamento, in latus tibiam postmodum reflecte, ac cartilagineum huius articuli ligamentum ad amussim expedito, et cartilagines tibiæ ossis sinum augentes, ab articulo acutiori cultello adimito. Ligamenti, quod tibiæ fibulam alligat, natura, si ad commissuram id diuidatur, citra negocium conspicitur. Membrana quoque isthæc ossa, qua inuicem distant, intercedens, sese iam citra ullam sectionem offert. Transuersa omnia modo dissecta sunt, atque iccirco superest duntaxat fibulam a tibia disrumpere, et ligamen ambo ossa colligans inquirere : dein acutiori cultello fibulam a talo, et postmodum a tibiæ osse talum liberare : ita enim duo sese offerunt tali ligamenta, cartilaginis specie donata. Duo autem reliqua disces, si cultello talum ab osse cymbam imitante diuiseris, et a calce talum abraseris : quod difficulter, idque nisi acuto cultello perfeceris. Ad hunc modum reliqua pedis ligamenta aggredieris, nempe ipsis secundum ossium commissuras circumsectis. Quam uero concinne hæc omnia a Natura sint formata, ex cuiusque ossis usu, et generali ligamentorum facultate, cuiuis notum esse arbitror. Quapropter neque hic, neque alias sæpius ad summi rerum Opificis encomia digressus sum, ne eadem semper aut de musculis aut ligamentis repetenti, in nimiam molem hæc excrescerent. Præcipue quum nihil facilius sit, quam prolixe in usus enarrationem excurrere, si modo actio a me semper descripta non lateat.

LIBRI SECVNDI FINIS.