DECIMIQVARTI CAPITIS FIGVRA
[Illustration]
PRÆSENTI figura nuda uasorum cerebri delineatio proponitur, a uenis arterijsque incoepta, priusquam illæ penitus in caluariam merguntur. Cæterum si forte hæc tabula singula cerebri uasa non ad amussim ostendat, eam nihilominus quo res alioquin difficilima minori negocio oculis subijciatur, ac a studiosis in dissectionibus promptius obseruetur, non mediocriter accommodaturam mihi persuadeo. Ne autem ramorum frequentia pleraque obscurarentur, unius duntaxat lateris uasorum seriem (nisi quandoque res secus exigat) delineatam conspicis, haud præteriens omnes propemodum septimi libri figuras huc quoque spectare, ac ab interiori margine ad illas lectorem ablegandum, perinde atque ad figuram huius libri calci insuendam.
A | Interior iugularis, qua iam caluariæ proxima est. |
B | Soporalis arteria. |
C | Secunda uena. |
D | Prima caluariam petens uena. |
E | Quarta uena. |
F | Tertia uena. |
G | Quinta uena. |
H | Sexta uena. |
I | Secunda arteria. |
K | Prima caluariam ingrediens arteria. |
L | Tertia arteria. |
M | Dexter, seu primus duræ cerebri membranæ sinus. |
N | Sinister duræ cerebri membranæ sinus, quem secundum nuncupamus. |
O | Primi et secundi sinuum congressus. |
P,P | Tertius duræ membranæ sinus. |
Q | Tertij sinus finis osseo commissus septo, quo olfactus organorum sedes interdiuiduntur. |
R | Quartus duræ membranæ sinus. |
S,S | Ductus a dextro sinu pullulantes, ac in duræ tenuisque membranarum sedes, quæ illis proximæ sunt, excurrentes. |
T,T | Ductus ex tertij sinus latere in tenuem diffusi membranam, quos solum abtruncatos depingere licuit. |
V,V | Ramuli ab infimo tertij sinus angulo in eam duræ membranæ partem deriuati, quæ dextram cerebri partem a sinistra seiungit. |
X,X | Tertij sinus surculi cum illis commissi uasculis, quæ per uerticem caluariam subingrediuntur. |