Ms BIU Santé no 2007, fo 151 vo.
Cl. viro Io. Dan. Horstio, Med. Doctori Francofurtum.
Accepi tuam, Vir Cl. cum gratissimo Disputationum vestrarum
fasciculo, per ornatissimum juvenem D. Pökium, quem lubens habeo
commendatissimum. De singulis habeo Tibi gratias amplissimas. Quæ
antehac misit D. Schefferus, jam accepi, cum suo Morono, utili libro et
valde commodo, præsertim junioribus, paucæ lectionis et paucorum librorum.
Christ. Bunken Thesim de Rheumatismo à Te expectabo, ut et alia quæ
volueris per optimum virum Seb. Switzerum, per quem ad vos reversurum alia
mittam, et si possim optima. Hollerius de morbis internis currit sub prælo :
finem editionis speramus circa 20. Sept. Disputationem tuam Lipsiensem de
Pulvere Peruviano, (de quo scripsit Vir Cl. Dominus Chiffletius, libellos duos
elegantissimos,) utinam aliquando videam : est ineptum et fallax medicamentum,
quod multos decepit, frustra persuasos à Iesuistis, Loyolitis, qui non alia de causa Magna-
tib. nostris obtundiunt suum pulverem, quàm ut faciant rem, si non rem, at
quocumque modo rem : et hominem de pulvere natum, pro auro signato, pul-
vere suo obivunt : O callidos et versipelles alchymistas, et rei faciendæ intelligentissimos !
De numismatis vestris mitto Tibi schedulum Caroli mei. Gratias ago
pro Epistolis Reinesij, quas offers, et jampridem habeo. Cl. Virum D. Laur.
Straussium saluto : tuæq. curæ committo hîc inclusam. Plura aliàs, quia
raptim scribo. ^ Vale, Vir Cl. et me ama. Parisijs, die xv. Iunij, 1663.
^ Cl. viros saluto populares tuos, DD. Petrum Lotichium, et utrumque Schefferum.
Eodem ipso die Gallicè scripsi ad D. Laur. Straussium, Horstij generum,
ut ejus Epistolæ Gallicæ responderem : ille est maritus Elizabetæ Mariæ Horstiæ.
