Ms BIU Santé n^o 2007, f^o 171 r^o.

Cl. viro Christiano Utenbogardo, Ultrajectum.

Scias velim, Vir Cl. libros à Te mihi emptos, tandem à D. Cavelier mihi
redditos fuisse, pro quib. gratias ago Tibi quam-possum maximas : unum superest,
ut indices eorum pretium, quod Tibi reddi curabo. 8. Iunij. Tandem amicus noster Alex.
Morus omnes adversarios suos superavit, et ab omni suspicione criminis, à proprijs
Iudicibus fuit absolutus, in quo etiam Regem nostrum, ut audio et gaudeo,
habuit favetem, dum jocosè dixit ejusmodi crimen objectum Moro facilè dilui
posse, quod tot alijs tam facilè condonatur, etiam Monachis et Sacerdotibus, ex quib.
quam-multi sæpissimè delinquunt. Sed dic rogo, quis ille Bernardus à Doma,
qui nuper scripsit adversus Ant. Deusingium, virum eruditum ? quare scripsit
et quid ? ubinam fuit editum novum istud Opusculum ? quomodo poterit haberi ?
Habésne Tibi notum et amicum illum Deusingium ? imò et illum alium, Bern.
à Doma, de quo numquam adhuc quidquam audivi : Ubinam gentium vivit ?