Ms BIU Santé no 2007, fo 75 vo.
Clar. viro D.D. Melchiori Sebizio, Argentinam.
Et postremam tuam Epistolam, et libros, et libellos, et quas ad me
misisti Theses, nisi beneficij loco habeam, omnino ingratus sim, et eo, quo me
hactenus complexus es, amore indignus : ne qua igitur mihi hæreat
αχαρισιας et negligentiæ culpa, exoratum te volo, uti me istas tuæ
benevolentiæ tesseras exiguo aliquo hostimento sinas agnoscere. Heurnium,
Varandæum, Riolanum, aut quos voles alios libros quantocyus mittam, si,
quod à Te mihi candidè significari peropto, placere Tibi intellexero : ita dum
fidem liberabo, animum explero meum. Tuum peregrinarum stirpium Indicem
communicavi cum Collega nostro Fr. Blondel, rei Botanicæ studiosissimo, penèq.
supra quàm dici potest perito. Plantas et semina pollicetur, ultróq. daturus est :
sed non antequam ex misso à Te Indice conjecerit, quænam Te rariores
plantæ deficiant, et quas penes Te habeas. Dum a. in eam rem tuam conficies
Indicem unde ut plantas ipsas ijsdem designes nominibus, quib. compellantur in
Bauhini Catalogo et Pinace, ne quid alioquin obscuritatis pariat nominum
varietas. Ex Horto regio nihil Tibi sperandum est, quod qui ipsi præfecti
sunt, alió occupati sint, aliarúmq. satagant rerum. Peccaturus quoque
sim nisi et Tibi gratias agam pro Medici pestilentis effigie, quæ mihi
planè videtur ridicula. Multam salutem impertio clarissimo Filio tuo,
qui si à me omne genus officiorum expectet, non fallam ejus opinionem.
Vale, et me ama.
Tuus aere et libra Guido Patin.
Paris. 17. Oct. 1658.
