Ms BIU Santé no 2007, fo 123 ro.
Clarissimo viro D. Dinckel, Doctori Medicinæ, Argentoratum.
Ecce Tibi mitto, Vir Cl. quod honesta tua invitatione postu-
lasti, nempe gaudij mei certum et constans argumentum super laurea
illa Doctorali nuper Tibi collata, in celeberrima illa vestra Academia :
si quod currente calamo, breviter in eam rem exaravi, Tibi arrideat, erit
sanè quod gaudeam : sin minus, chartas meas ures, et tardipedi Deo
de ijs sacrum offeres facies : aliud non potui, tum propter otij penuriam, tum
multorum ægrorum visitationibus, et varia aliorum negotiorum
mole miserè distractus, tum propter frigidiores Musas meas, nondum
bene refocillatas, ob morbum hyemis postremæ, à quo nondum bene
aut nec integrè sum mihi restitutus. Dominum Socerum tuum saluto, ut et
viros præstantissimos, utrumque Sebizium. Memineris, quæso,
Theseωn vestrarum, et aliarum Disputationum, aut Orationum Academicarum,
quarum pretium libentissimè refundam, si quæ prostent, aut Tibi vænales
offerantur, tam recentes quàm veteres, compactæ vel non compatæ.
Quidquid Tabellario vestro mihi deferendum tradidebis, accipiam, et
vecturæ pretium persolvam, Tibiq. grato animo satisfaciam. Multa debeo
D. Melch. Sebizio, pro ijs quæ ab eo per Te antehac accepi. Tu rei
totius arbiter esto, et jube vel decerne quid volis ut mittam venerando Seni,
libros vel pecunias, ea fini ut antiquum istud nomen expungam, et alieno isto ære
me liberem, quod ante et supra multa alia vehementer opto :
numquam enim quidquam cuiquam tam diu debui : et sanè, ut verum dicam,
debitum istud adeo mihi molestum est, ut vellem numquam debuisse,
nec quidquam à viro Cl. accepisse, ^ quem tamen aliàs ex omni parte/ suspicio atque vereor : sum enim/ illi multiplici nomine obstrictis-/simus et addictissimus. Vale, et me ama. Datum Parisijs, 14.
Aprilis 1662.
Tuus es animo Guido Patin.
