Ms BIU Santé no 2007, fo 145 vo.
Clar. viro D. Io. Ant. Vander Linden, Leidam.
28. Aprilis. Heri ad Te scripsi, Vir Cl. festinante calamo, et penè aliud agendo, ut Te
monerem à Fratre D. le Rebours mihi satisfactum fuisse pro summa
mille duocentarum libellarum Turonensium, quas mutuo debebas nomine meo,
D. le Rebours, Rationario regio : i. quatre cens escus à M. le Rebours,
Maistre des Comptes à Paris : quam summam hîc habeo penes me, eámque
cautè servabo, usque in Filij tui adventum, vel usque quo aliter decreveris.
Pro sex tuis exemplaribus de Scriptis Medicis à Te mihi destinatis, puto
me habere viam tutam et securam. Si quæ navis oneraria et mercatoria
discedat à vestro portu pro Rothomago, fasciculum illum tuum bene compactum
mitte Rothomagum cum sequenti Inscriptione. A Monsieur Monsieur Baron,
Docteur en Medecine, devant S. Amand, à Roüen ; pour faire tenir à M. Guy Patin,
Docteur en Med. et Professeur du Roy à Paris, dans le Carfour du Chevalier
du Guet à Paris. Dominus Baron, vir optimus fasciculum accipiet à naviculario,
cui vecturæ marinæ pretium persolvet, et ac 2 ad me transmittet 1 per viam tutam. Quis sit
ille D. le Vasseur, cui sextum Exemplar destinasti, indica mihi, neq. enim illum
novi : plures sunt in hac Urbe sic cognominati. Hippocrates tuus utinam citò ad
umbilicum perveniat, omniumque voto, et præsertim tuo respondeat. Petrus
Petitus bene se habet, Teque salutat, ut et ambo Filij mei. Pro illa
summa argentea, et singulari tua munificentia, me rogante, D. le Rebours
collata, gratias iterum ago Tibi quam maximas. Regina Parens, non absque
suorum mærore summo, hîc decumbit ex febre duplici tertiana, pro qua
extinguenda sexies illa ei venam secuerunt Medici aulici : necdum res ejus in tuto sunt.
