Ms BIU Santé no 2007, fo 159 vo.
Clar. viro D. Michaeli Horn, Doct. Medico, Lipsiam.
Sæpius de Te cogitavi, et in mente habui, Vir Cl. imò et Te quæsivi,
ut ad Te scriberem. Hoc inter alia debeo Cl. viro, veteri amico meo Car. Sponi[o,]
Med Lugdunensi, qui mihi author fuit ut ad Te scriberem, promisitq.
se effecturum, ut hæc mea Tibi redderetur. Mei forsan non meministi,
interroga memoriam tuam, et recordare Petri Gassendi, regij Mathematica-
rum Artium professoris, ad quem proximè propè moribundum Te deduxi, cum socio
tuo, Gothofredo Neuman, Vratislaviensi, quem ex animo saluto. Si velis in
posterum, mutuam inter nos amicitiam colemus, et ad Te interdum scribam,
mediante D. Spon, per quem etiam ad Te mittam quidquid librorum ex hac
Urbe nostra volueris. Ego v. interea, dum tuas expecto, amorem tuum ambio,
rogoq. ut me vicissim ames et te amantem redames. Si apud Bibliopolas
vestros vænales exstarent Theses aliquot Medicæ vel Physicæ, aut Orationes
aliquot Academicæ, à vestris Professoribus habitæ, eásq. mihi velles emere,
in maximo beneficio mihi collato, tantum officium reponerem : emptionis
impensas et pretium libentissimè Tibi refundam, vel per Sponium nostrum,
vel per mercatores Metenses, qui quotannins ad nundinas Lipsienses,
vestram Urbem adeunt. De ijs itaque cogitere velim, pro quo officio
quidquid hîc habetur eruditum aut curiosum, Tibi offero. Hîc habemus
ab aliquot mensibus magnum Opus practicum, nempe Iac. Hollerium,
de morbis internis, in folio, cum Scholijs ejusd. Enarrat. et Annotat.
Lud. Dureti, et Exercitat. Ant. Valetij, quæ singula antehac prodie-
runt : sed huic postremæ editione accesserunt de novo, Io. Hautini,
Med. Paris. Cl. Observationes et Commentaria : quæ si Tibi arrideant, facil[è]
mittam si volueris, per quam viam indicaveris. Vive, vale, et me ama. Paris.
die Veneris, 22. Febr. 1664. Tuus ex animo, Guido Patin, Doctor Medicus,
et Prof. regius.
