Ms BIU Santé 2007, fo 236 ro.
Alvi ille fluor qui malè habet in hunc usq. diem ægrotantem, haud
dubiè mesentericus est, id est, humoris qui effluit quoq. sedes die, sedes,
mesenterium est ; in quo jamdudum congesta illuvies, et illa quidem
varia, conflata scilicet ex congrege humore, bilioso, pituitoso et
melancholico : Natura oppressa copiâ impuritatis istius sese expedivit
per alvum, unde profluvium istud : perennis gravatio istius impuritatis
hactenus profluvium fovit : ex putredine illuviei accensus calor,
et ille σηπεδονωδης ; nidore cacochymiæ istius afflata edulia cor-
rumpuntur, corrupta suppeditant pabulum isti profluvio : ut illud
non antè possit compesci quàm intemperies ista calida mesenterio,
ceterisq. nutritijs viscerib. altè reposta, temperata fuerit, et illius
fomes subductus. Medendi ratio utrumque scopum spectare debet :
et remedia quæ in posterum usurpabuntur, eò etiam dirigi debent.
Propterea semel, iterum, tertiò, sæpius fortassis detrahendus sanguis
ex utroq. brachio, habita ratione virium : eluenda alvus non tamen
enemate, eóq. blando, quandoq. parato dumtaxat ex decocto hordei
sine melle, quandoq. mellis rosacei uncijs duabus : sed et potio
quoq. exhibenda, medicata folliculis, rheo, medulla cassiæ :
repetenda et illa identidem usquedum prorsus alvus fuerit expur-
gata. Cathartica vehementiora fugienda, præcipuè metallica,
remediáne an piacula ? sanè, eorum usu accederetur calor ille
istius profluvij auctor. His remedijs si accesserit victus ratio
consentanea morbo, refrigerans et humectans, ut abstemius sit
æger, et elixis potiùs vescatur cibis, jusculis carnium saporatis
cichorio albo et oxalide, non dubitamus quin lenetur æger
tandem et liberetur molesto hoc alvi profluvio, maximè si
medendi labori Deus aspiret : atq. id quidem optamus : optatis
succedat eventus. Si nos auditis, carebit æger analepticis istis
cardiacisq. omnibus quovis modo paratis : etenim hæc nullius sunt momenti
ad curationem morbi ; sed et morbi causam adaugent ; alimento natura
firmabitur, firmata seipsa liberabit et symptomata et morbo.
18. Ianu. 1644.
