Ms BIU Santé no 2007, fo 162 ro.
Quum Epistolam illam tam laudatoriam, imò adulatoriam et mendacissimam
scripsit D. Ioncquet ad Guenaldum, tunc eo indigebat, et gratiam aliquam ab eo
sperabat : sed non successit illud negotium, et Guenaltum hodie non dumta-
xat spernit, sed etiam fortiter odit Ioncquetus, hominem bonis omnibus invisum ac
odiosum. Sed valeat iste nebulo caco-chymicus, et abeat in malam rem,
cum suis fraudibus, ut ad Te revertar. Monitum tuum valde probo, et mentem
tuam servabo super literis meis ad Te mittendis per D. Van-Ganguel : semel
dictum sapienti sat est : Te probè intelligo. Maximum virum saluto D. Tim.
Gesselium : servet eum Deus : Libro suo quem habet sub prælo, sapientem titu-
lum præfixit : qui utinam faustis avibus citò lucem videat, ut et Anatomia
nova D. Diemerbroeck. Ad virum Cl. D. Mart. Schoockium, ex oblata
occasione pauca scribo, sed Evangelium illi narro atque denuntio : fac ergo
ut ad eum certò feratur. Nihil hîc habemus novi : itaque spatijs exclusus
iniquis desino. Vive, vale, et me ama. Parisijs, 18. Febr. 1664. Tuus etc. |