Ms BIU Santé no 2007, fo 100 ro.
Cl. viro D. Thomæ Bartholino, regio Medicinæ Prof. Hafniam.
Vir Cl. heri me convenit popularis quidam tuus vir nobilis Dominus
Petrus Schoumaker, cum quo jucundissimum habui de Te colloquium :
valde lætatus sum quod mei memineris, et fasciculum Operum tuorum
mihi confeceris, quem patienter expectabo : ostendit Ille mihi
quendam Indicem tuorum Operum, quem alijs adjungas velim. Pauca
sunt hîc nova, præter mortem Mazarini, quem aulici medicastri,
saluberrimæ artis admodum ignari, et toti, ut ipsi nugantur, in secretis
Chymicis repositi, turpiter mactarunt, ac Diti tradidebunt, cum
suis granis narcoticis opiatis, et suo vino verè veneno stibiali,
venenatissimo. Secreta profitentur isti nebulones, qui primum,
præcipuum, ac penè unicum Artis nostræ secretum non tenent,
nempe veram ac legitimam bene medendi methodum, quod quæ est
secretum secretorum secretissimum, sed paucis notum. Hîc habemus
eruditum quendam Collegam qui sese accingit ad editionem duorum
librorum : quorum unus erit de Pleuritide, eritq. instar Methodi
medendi generalis : erit alter de Vomitu, stibijq. veneno. Utrumque
facilè habebis, postquam editus fuerit : si tamen interea mihi aliquem
indicaveris cui tutò possim aliquid committere, mittam Tibi fascicu-
lum, ex ijs conflatum quæ hîc prostant, libellis nimirum ac Thesibus
Scholæ nostræ, cum solemni quodam Senatuconsulto quod ante annum obtinuimus
adversus superbum ac superciliosum quodam hominum genus, nempe tonsores et Chirurgicos togatos,
et manicatos. Ergo tandem obijt Mazarinus, qui totius Europæ
cervicibus imminebat, nimia armatus potentia, nempe gratia et
authoritate Regis nostri Christianissimi : et propter nos homines nostramq.
salutem descendit ad inferos : i. ^ per vinum eneticum,/ et venenum chymisticum, penetravit unde negant redire quemquam.
Carissimos tuos et suavissimos ac eruditissimos fratres omnes saluto,
et ex ijs præsertim Erasmum. Vale, vir præstantissime, meq. quod facis,
amare perge. Parisijs, 9. Martij, 1661. Tuus es animo Guido Patin.
