À Christiaen Utenbogard, le 20 décembre 1663
Transcription

ms BIU Santé 2007, fo 159 ro.

Clar. viro D. Christ. Utenbogardo, Medicinæ Doctori, Ultrajectum.

Mitto Tibi, Vir Cl. Epistolam quam hîc ab aliquot diebus habeo, ad Te
mittendam : ea est duorum nobilium Gallorum, quos tam generosè humanè excipisti, tam tot
et tot tantis beneficijs affecisti, ut generositatem tuam satis laudare, et pro meritis præ-
dicare non possint. Cogitaverant de quodam munere Tibi offerendo, quod hactenus
fieri non potuit propter inæqualitatem tempestatis : aliam quærunt occasionem, per
quam agnosces gratum ac memorem eorum animum. Accepi per Rothomagum, ex
missione Sim. Moinet, Fasciculum illum librorum à Te mihi emptorum : pro quo
gratias ago singulares : sed erat apertus Fasciculus, nec ullum accepi Indiculum
eorum quæ debebant in eo contineri : si quem apud Te habeas, mitte quæso, ut videam
quomodo accedant ad æstimationem nostram : quod si penes Te nullum habeas, et eo
carebo ; vel repetam à Sim. Moinet, si quem habeat mihi mittendum. Quî se
habet D. Schoockius : quandonam veniet editio altera libri de Cervisia ? Aliud
unum mihi superest Tibi proponendum. In Adversarijs meis deprehendo Syllabum
quorundam librorum, pro quibus mihi emendis ad Te scripseram, rogabámq. ut cura
tua mihi emerentur ; an illum acceperis, an Epistola illa perierit, nec Tibi reddita fuerit,
nescio : sed hoc metuo : de illa enim per tuas nihil audivi : mea illa scripta est hîc,
6. Ianu. 1663. Interroga quæso memoriam tuam, et super hoc articulo
responde : si acceperis, emptionem illam tuamæ curæ committo : si non acceperis, alium Indicem Tibi
remittam : cujus hoc est initium : Ant. Matthæi Orationes, præcipuè Iuridicæ, etc. 12.
Calendarium Romanum, in folio patenti.
Catullus, Tib. Propertius, cum Notis
variorum, ex recensione Sim. Gabbema. 8. etc.
Indictum à Te pretium Tibi statim
refundi curabo : habeas igitur rationem meæ deprecationis, ut statim exaudiar.
De Papa, de Turca, de Iesuitis, de Fuqueto, nihil novi : cuncta silent : sub
finem hyemis multa renovabuntur, præsertim bellum in Italia, etc. Vale
vir præstantissime, et me ama. Parisijs, 20. Dec. 1663. Tuus etc.

Imprimer cette note
Citer cette note

x Correspondance complète et autres écrits de Guy Patin, édités par Loïc Capron. – Paris : Bibliothèque interuniversitaire de santé, 2018. – À Christiaen Utenbogard, le 20 décembre 1663. Note s

Adresse permanente : //www.biusante.parisdescartes.fr/patin/?do=pg&let=1304&cln=s

(Consulté le 04.04.2020)

Licence Creative Commons